Ministri në Detyrë për Evropën dhe Punët e Jashtme Gent Cakaj, zhvilloi një takim me Kryetarin e Parlamentit të Maqedonisë së Veriut, z.Talat Xhaferi. Ministri Cakaj vlerësoi kontributin e çmuar të Kryetarit Xhaferi në finalizimin e Marrëveshjes së Prespës me miratimin e ndryshimeve kushtetuese.

“Aderimi i Maqedonisë së Veriut në NATO dhe rruga e përbashkët drejt BE-së është vlerë e shtuar për zhvillimin e rajonit dhe veçanërisht për kultivimin e paqes dhe stabilitetit”, u shpreh Cakaj në fjalën e tij.

Nga ana e tij Kryetari i Parlamentit Xhaferi shprehu mirënjohjen për mbështetjen që ka dhënë Shqipëria në këtë proces duke qenë njëkohësisht dhe një nga vendet e para në ratifikimin e Protokollit të Anëtarësimit të Maqedonisë së Veriut në NATO.

Të dy bashkëbiseduesit theksuan rëndësinë e intensifikimit të bashkëpunimit në planin dypalësh, rajonal dhe veçanërisht në atë të përmbushjes se reformave dhe detyrave të domosdoshme për marrjen e datës së fillimit të negociatave me BE-në.