MPJ e Shqipërisë përshëndet propozimin e Komisionit Evropian për udhëtimin pa viza të qytetarëve të Kosovës në zonën Schengen, si një hap të rëndësishëm në lehtësimin e kontakteve dhe forcimin e mëtejshëm të marrëdhënieve midis Kosovës dhe Bashkimit Evropian.
 
Liberalizimi i vizave shënon progres në procesin e integrimit evropian të Kosovës dhe e bën të prekshme perspektivën evropiane për qytetarët kosovarë. Kjo perspektivë përbën një mbështetje të pazëvendësueshme për procesin e reformave edhe për vendet e tjera të rajonit.

Propozimi i Komisionit Evropian është njohje e arritjeve të reformave shtet-ndërtuese në Kosovë, veçanërisht në fushën e sundimit të ligjit.
 
Shqipëria shpreson në një miratim të shpejtë të propozimit të Komisionit Evropian nga Këshilli i Bashkimit Evropian dhe Parlamenti Evropian, në mënyrë që të përmbushet një prej angazhimeve të Samitit të Selanikut të vitit 2003 për udhëtimin pa viza të qytetarëve të gjashtë vendeve të Ballkanit Perëndimor.