Ambasador Fatos Reka, zhvilloi një takim kortezie me Zëvendëskryeministrin e Parë dhe Ministër përSistem Politik dhe Marrëdhënie Ndërmjet Bashkësive të Republikës së Maqedonisë së Veriut, z. Artan Grubi.
Ambasadori pasi i uroi suksese Zvkm. Grubi, për rizgjedhjen e tij në detyrën e rëndësishme, nënvizoi faktin që raportet ndërmjet dy vendeve tona janë shumë të mira, kjo fare lehtë e vërtetueshme edhe nga niveli i lartë i bashkëpunimit si edhe mbledhja e përbashkët e dy qeverive si dhe nevojën e intensifikimit të tyre për tejkalimin me sukses të sfidave drejt integrimit në Bashkimin Europian.
Nga ana e tij, Zëvendëskryeministri i parë Grubi falenderoi Ambasadorin Reka për urimin dhe shprehu rëndësinë e mbështetjes së ndërsjellët që të dyja vendet duhet t’i japin njëra tjetrës në prioritetet e përmirësimit të standardit jetësor të qytetarëve dhe avancimit të nivelit të komunikimit dhe bashkëpunimin më efikas tregtar duke krijuar predispozita bashkëkohore infrastrukturore.
Grubi njoftoi ambasadorin Reka për fazat e realizimit të projekteve të rëndësishme të ndërlidhjes infrastrukturore më efikase mes të dyja vendeve si: Korridori 8, Rruga e Arbërit, lidhja e transmetimit energjetik Manastir – Elbasan dhe projekte të tjera madhore.
Në fund të këtij takimi të dy bashkëbiseduesit folën edhe për marrëdhëniet e mira ndër fqinjësore dhe për zbatimin e përpiktë të Marrëveshjes së Ohrit në përputhje me kushtetutën e vendit me theks të veçantë respektimin e barazisë gjuhësore dhe të përfaqësimit të drejtë institucional.