Në datën 25 mars, ambasadori Pëllumb Qazimi vizitoi kompaninë sllovene LITOSTROJPOWER në Lubjanë. Ai u prit në takim nga Marko Tandler, drejtor i përgjithshëm dhe kryetar i bordit të drejtorëve të kompanisë. Vizita u realizua së bashku me Janez Podobnik, president i ECPD-së, me cilësinë e bashkëorganizatorëve të tryezës së rrumbullakët kushtuar bashkëpunimit Shqipëri-Slloveni, zhvilluar në Lubjanë në datën 4 mars 2016.

Gjatë takimit u prezantua profili i kompanisë, si kompania me e njohur sllovene në fushën e ndërtimit të hidrocentraleve, përfshi edhe përmirësimin e anës teknologjike të tyre. Kompania LITOSTROJPOWER është e pranishme në rreth 60 vende, gati në të gjithë kontinentet. Për më tepër, kjo kompani jo vetëm ndërton hidrocentrale, por është prodhuese e të gjithë pjesëve teknologjike. Gjithshka për këtë kompani është "Made in Slovenia". Mandej u vizituan edhe mjediset prodhuese.