Gjatë vizitës në Bruksel, Ministri për Evropën dhe Punët e Jashtme i Shqipërisë, Ferit Hoxha, u takua me përfaqësues të diasporës shqiptare, duke theksuar rolin e saj si një forcë e rëndësishme dhe një lidhje e gjallë me atdheun.

Ambasada e Republikës së Shqipërisë në Belgjikë organizoi një aktivitet të posaçëm për të vlerësuar punën e mësuesve të gjuhës shqipe në diasporë. Iniciativa vuri në dukje përkushtimin e tyre të vazhdueshëm në ruajtjen e gjuhës shqipe, promovimin e identitetit kulturor dhe forcimin e lidhjes së brezave të rinj me rrënjët e tyre.

Përmes angazhimit, durimit dhe përkushtimit të tyre, këta mësues luajnë një rol themelor në transmetimin e gjuhës, historisë dhe traditave shqiptare, duke kontribuar në ruajtjen e identitetit kombëtar në komunitetet shqiptare jashtë vendit.

Ministri Hoxha shprehu mirënjohje për mësuesit dhe prindërit për angazhimin e tyre të vazhdueshëm, duke theksuar se kontributi i tyre siguron që gjuha shqipe të mbetet e gjallë dhe të përcillet ndër breza, përtej kufijve të vendit.

Samiti i Diasporës, me moton “Përmes Rrënjëve Lartësohemi”, që do të zhvillohet më 14–15 prill 2026 në Tiranë, pritet të shërbejë si një platformë e rëndësishme për dialog dhe bashkëpunim, me qëllim forcimin e mëtejshëm të përpjekjeve për ruajtjen dhe promovimin e trashëgimisë gjuhësore, kulturore dhe shpirtërore shqiptare.