Me rastin e Ditës Ndërkombëtare të Gruas, vajzat dhe gratë e komunitetit shqiptar në Kanada u mblodhën së bashku në kryeqytet për të festuar, reflektuar dhe ndarë historitë e tyre frymëzuese të përkushtimit, sakrificës dhe suksesit në rrugëtimin e tyre personal dhe profesional.

Në respekt të besimtarëve myslimanë dhe për shkak të përputhjes së datës me muajin e shenjtë të Ramazanit, ngjarja u organizua më herët, duke ruajtur në thelb vlerat e përbashkëta të solidaritetit, mirënjohjes dhe respektit të ndërsjellë.

Ishte një kënaqësi dhe nder i veçantë të përshëndetnim përfaqësimin dinjitoz dhe të fuqishëm të gruas shqiptare në Kanada – simbol i forcës, përkushtimit dhe identitetit tonë të përbashkët.

Ambasada e Republikës së Shqipërisë në Kanada, së bashku me Ambasadën e Republikës së Kosovës, përcjellin urimet më të përzemërta për çdo vajzë dhe grua shqiptare, me lutje për shëndet, bekime dhe gëzim të vazhdueshëm në jetën e tyre.