Misioni i Përhershëm i Republikës së Shqipërisë pranë Zyrës së OKB-së dhe organizatave të tjera ndërkombëtare në Gjenevë shpall thirrjen për të reja dhe të rinj të motivuar dhe me interes në fushën e të drejtave të njeriut për t’u angazhuar për periudha 3 ose 6-mujore pranë Misionit.

Përshkrimi i punës

Të drejtat e njeriut përbëjnë një pjesë integrale dhe të konsoliduar të veprimtarisë së Misionit shqiptar në Gjenevë. Shqipëria është zgjedhur anëtare e Këshillit të të Drejtave të Njeriut (KDNJ) për periudhën 2024-2026.

Praktikantja/i do të ketë mundësi të mësojë për rolin e shërbimit të jashtëm shqiptar dhe Shqipërisë mbi çështjen e të drejtave të njeriut në një kontekst ndërkombëtar.

Puna do të përqëndrohet në Këshillin e të Drejtave të Njeriut dhe Rishikimin Periodik Universal. Praktikantja/i do të marrë pjesë në takime, do të kryejë punë kërkimore si dhe do të mbështesë Misionin në veprimtaritë për organizimin e aktiviteteve të ndryshme në fushën e të drejtave të njeriut.

Praktika do të kryhet nën drejtimin e diplomates/it që mbulon dosjen e të drejtave të njeriut në Mision.

Praktika është një mundësi e shkëlqyer për t’u përfshirë drejtpërdrejtë në marrëdhëniet ndërkombëtare dhe çështjet shumëpalëshe. Ne i konsiderojmë praktikantët tanë një pjesë integrale të ekipit.

Edukimi, kualifikimet, aftësitë, përvoja

Të interesuarit duhet të kenë një diplomë universitare në fushat e të drejtave të njeriut, të drejtës ndërkombëtare, diplomacisë, marrëdhënieve ndërkombëtare, shkencave politike ose disiplina të tjera të përafërta.

Të interesuarit duhet të jenë të motivuar, fleksibël, me aftësi të shkëlqyera në komunikim dhe organizim, si dhe me interes për fushën e të drejtave të njeriut dhe OKB-së.

Vlerësohen përvoja të mëparshme pune në fushën e të drejtave të njeriut ose në diplomaci.

Aftësitë gjuhësore: Zotërimi i shkëlqyer i anglishtes dhe/ose frëngjishtes së folur e të shkruar.

Aftësitë IT: Njohuri të mira të programeve MS Word dhe Excel.

Kushtet e praktikës: Aplikanti duhet të ketë leje qëndrimi në Zvicër / Shengen për periudhën e plotë të praktikës dhe të jetë i siguruar sipas rregullave të parashikuara nga legjislacioni në fuqi në Zvicër.

Praktika do të kryhet pa shpërblim.

Të interesuarit ftohen të dërgojnë një Curriculum Vitae dhe letër motivimi në adresën elektronike të Misionit:  mission.geneve@mfa.gov.al.