Në Berlin vazhdon Java e Kulturës Shqiptare dhe Nëntori Kuqezi edhe me pritjen zyrtare dhe koncertin klasik me rastin e 112-Vjetorit të Pavarësisë dhe Ditës së Forcave të Armatosura të Republikës së Shqipërisë.

Pritja u organizua në sallat prestigjoze të Përfaqësisë së Landit Nordrhein-Westfalen, ku morën pjesë zyrtarë të MPJ gjermane, përfaqësues të institucioneve qëndrore e vendore të Gjermanisë, trupi diplomatik dhe atashetë ushtarakë të akredituar në Berlin, si dhe miq të Shqipërisë e Ambasadës.

Përshëndetën Ambasadorja e RSH në Gjermani, znj. Adia Sakiqi, Atasheu Ushtarak, Kolonel Arben Zani dhe Zv. Drejtuesja e Përfaqësisë së Landit të NRW, znj. Sieglinde von Wasielewski.

Pritja u kremtua me një koncert klasik me këngë shqiptare të interpretuara mjeshtërisht nga artistet shqiptare, mezo soprano Vikena Kamenica dhe pianistja Merita Rexha Tërshana, të cilat mbushën sallën me emocione të jashtëzakonshme.

Falenderojmë artistet tona për performancën e tyre magjike, të cilat na sollën një pjesë të kulturës dhe artit shqiptar.

Gjatë aktivitetit u prezantua edhe ekspozita “Rruga e Lirisë: Çlirimi i Shqipërisë në fotografi historike”.