Ministri për Evropën dhe Punët e Jashtme, Ferit Hoxha, ndodhet në Helsingborg të Suedisë ku ka nisur Takimi Jozyrtar i Ministrave të Jashtëm të vendeve anëtare të NATO-s.
Ky takim përfaqëson një moment të rëndësishëm në kuadër të përgatitjeve për Samitin e ardhshëm të NATO-s, që do të mbahet në Ankara, më 7–8 korrik 2026.
Ministrat e Jashtëm të vendeve aleate pritet të diskutojnë prioritetet kryesore për forcimin e Aleancës, ndarjen më të drejtë të barrës, si dhe vijimin e mbështetjes për Ukrainën.
Ministri Hoxha në Takimin e Ministrave të Jashtëm të NATO-s në Helsingborg të Suedisë:
*Angazhim i palëkundur i Shqipërisë ndaj vlerave të NATO-s, forcimin e lidhjes transatlantike dhe rritjes së investimeve në mbrojtje, në përputhje me angazhimet e Aleatëve.
Buxheti ynë i mbrojtjes për vitin 2026 përfaqëson nivelin më ambicioz të investimeve që kur Shqipëria iu bashkua Aleancës, duke kontribuar në aftësi më të forta kombëtare dhe siguri kolektive.
*Mbështetje e plotë e Shqipërisë për Ukrainën si një gur themeli i sigurisë evropiane dhe vazhdimin e ndihmës përmes mekanizmave të NATO-s. Në këtë kontekst, në 12 qershor, do të bashkëorganizojmë në Tiranë, së bashku me Ministrin Andrii Sybiha, Takimin Ministror Ukrainë-Evropë Juglindore.
*E rëndësishme mbetet një qasje 360 gradë ndaj sigurisë dhe mbajtjes së një fokusi të fortë në stabilitetin në Lindjen e Mesme dhe Ballkanin Perëndimor. Shqipëria mbetet plotësisht e angazhuar në mbështetjen e stabilitetit rajonal, duke përfshirë diskutimet e Aleatëve mbi të ardhmen e KFOR-it dhe bashkëpunimin e NATO-s me Kosovën.
*Ndërsa ecim drejt Samitit të NATO-s në Ankara në korrik 2026, Samiti i ardhshëm i NATO-s në Tiranë do të përfaqësojë një moment historik për rajonin dhe një sinjal të fortë të angazhimit të qëndrueshëm të Aleancës ndaj Ballkanit Perëndimor.
