Dje (16.02.2025), me rastin e 17-vjetorit të Pavarësisë së Republikës së Kosovës, Shoqata Kulturore “Bashkimi” në Uster të Zyrihut organizoi një aktivitet kulturor me të rinjtë shqiptarë, të cilët me performancat e tyre artistike emocionuan publikun e pranishëm.
Në këtë ngjarje të veçantë morën pjesë Ambasadori i Kosovës në Bernë, z. Mentor Latifi, Sekretari i Parë i Ambasadës së Republikës së Shqipërisë në Bernë, z. Valon Gashi, si dhe shkrimtarë, artistë dhe veprimtarë të shquar të diasporës shqiptare në Zvicër. Gjatë fjalës së tij, z. Gashi përgëzoi organizatorët për këtë aktivitet domethënës që promovon kulturën dhe identitetin shqiptar në diasporë, duke vlerësuar kontributin e të rinjve në ruajtjen e trashëgimisë sonë kombëtare. Ai gjithashtu uroi të gjithë të pranishmit dhe mbarë popullin shqiptar Gëzuar 17-vjetorin e Pavarësisë së Kosovës!
Urime Kosovë 17-vjetori i Pavarësisë!
Në këtë ditë të rëndësishme për kombin shqiptar, Ambasada e Republikës së Shqipërisë në Bernë i uron kolegëve, popullit dhe institucioneve të Republikës së Kosovës Gëzuar 17-vjetorin e Pavarësisë!
Kosova është një histori suksesi e qëndresës dhe përpjekjeve për liri e shtetndërtim. Në këto vite, ajo ka treguar përkushtim për demokracinë, zhvillimin dhe forcimin e institucioneve të saj.
Le të vazhdojmë së bashku për një të ardhme të ndritur për kombin tonë!
