Aktiviteti i organizuar nga Ministria për Evropën dhe Punët e Jashtme në partneritet me Kombet e Bashkuara në Shqipëri, reflektoi angazhimin e fortë të Shqipërisë për paqen, zhvillimin e qëndrueshëm dhe të drejtat e njeriut.

Zëvendësministrja për Evropën dhe Punët e Jashtme, znj. Vilma Premti theksoi përkushtimin e Shqipërisë ndaj multilateralizmit dhe partneritetit me OKB-në, duke deklaruar:

“Shqipëria është krenare që është një anëtare aktive e familjes së Kombeve të Bashkuara prej 70 vitesh. Angazhimi ynë për paqen, drejtësinë dhe zhvillimin e qëndrueshëm mbetet i palëkundur ndërsa punojmë krah për krah me OKB-në për të ndërtuar një të ardhme më të mirë për të gjithë shqiptarët dhe botën.”

Koordinatorja Rezidente e Kombeve të Bashkuara, Ingrid Macdonald, vlerësoi rolin aktiv të Shqipërisë në sistemin e OKB-së dhe udhëheqjen e saj në avancimin e Objektivave të Zhvillimit të Qëndrueshëm. Ajo theksoi punën e OKB-së në Shqipëri, duke përfshirë mbështetjen për zhvillimin e kapitalit njerëzor, rritjen e gjelbër dhe gjithëpërfshirëse, forcimin e sundimit të ligjit dhe qeverisjes, si dhe avancimin e barazisë gjinore.

Partneriteti i OKB-së me Shqipërinë ka mundësuar forcimin e shërbimeve sociale, ka rritur qëndrueshmërinë lokale ndaj klimës, ka mbështetur reformën gjyqësore dhe ka promovuar aksesin dixhital në shërbimet publike.

Udhëheqja e Shqipërisë në barazinë gjinore vazhdon të përparojë, duke reflektuar angazhimin e vendit për t’i shndërruar të drejtat në realitete për të gjithë qytetarët.

Një mesazh i veçantë video nga Sekretari i Përgjithshëm i OKB-së, António Guterres, i bëri jehonë premtimit themelor të OKB-së: “Ne popujt e Kombeve të Bashkuara…”.

Guterres bëri thirrje për solidaritet të ripërtërirë global dhe veprim kolektiv për të adresuar sfidat urgjente si konflikti, ndryshimi i klimës dhe rreziqet teknologjike.