Faleminderit, Znj. Kryetare.

E mbaj këtë deklaratë në emër të Australisë, Spanjës, Uruguait, vendit tim Shqipërisë, si dhe 59 shteteve të tjera anëtare dhe vëzhguese të Kombeve të Bashkuara:
Afganistani, Andorra, Armenia, Austria, Belgjika, Bosnja dhe Hercegovina, Brazili, Bullgaria, Cabo Verde, Kanadaja, Kili, Kolumbia, Kosta Rika, Kroacia, Qipro, Çekia, Danimarka, Estonia, Finlanda, Franca, Gjeorgjia, Gjermania, Greqia, Guatemala, Hungaria, Islanda, Irlanda, Izraeli, Italia, Letonia, Libani, Lihtenshtajni, Lituania, Luksemburgu, Malta, Ishujt Marshall, Meksika, Monako, Mongolia, Mali i Zi, Mbretëria e Holandës, Zelanda e Re, Maqedonia e Veriut, Norvegjia, Panama, Filipinet, Polonia, Portugalia, Republika e Moldavisë, Rumania, Serbia, Sllovakia, Sllovenia, Suedia, Zvicra, Timor-Leste, Ukraina, Mbretëria e Bashkuar dhe Bashkimi Evropian.

Në këtë sesion të 70-të të Komisionit për Statusin e Grave, shprehim shqetësimin tonë të thellë për erozionin e vazhdueshëm sistematik të të drejtave të grave dhe vajzave në Afganistan.

Që nga gushti i vitit 2021, gratë dhe vajzat afgane janë përballur me një regres të gjerë të të drejtave, më të madhin në botë.

Talebanët kanë treguar një shpërfillje të përhapur ndaj detyrimeve të Afganistanit në fushën e të drejtave të njeriut, përfshirë ato sipas CEDAW dhe CRC. Kufizimet e vendosura mbi lirinë e lëvizjes së grave dhe vajzave, si dhe aksesin në arsim, punë, shëndetësi dhe mbrojtje ligjore, shkelin të drejtën ndërkombëtare dhe u mohojnë atyre dinjitetin dhe vetëvendosjen.

Ne bëjmë thirrje për rivendosjen e pjesëmarrjes së plotë, të barabartë dhe kuptimplotë të të gjitha grave dhe vajzave në jetën publike dhe politike të Afganistanit, si dhe në hapësirën e tyre qytetare.

Duke njohur temën prioritare të këtij sesioni të CSW, shprehim alarm për thellimin e diskriminimit me bazë gjinore nga ana e talebanëve në ligj, politika dhe praktikë, si dhe ndërhyrjen në shpërndarjen e ndihmës humanitare për ata që kanë më shumë nevojë.

Gratë janë përjashtuar dhe larguar nga rolet e tyre në sistemin e drejtësisë. Dekretet e talebanëve – të përfshira në të ashtuquajturin ligj të “moralit” dhe në kodin penal më të fundit – fshijnë në mënyrë sistematike gratë dhe vajzat, përfshirë ato që i përkasin pakicave etnike dhe fetare, nga jeta publike dhe i ndëshkojnë ato për rezistencën ndaj këtij përjashtimi. Dispozitat që në praktikë lejojnë ndëshkime fizike “disiplinore” janë të papranueshme.

Kjo fushatë në thellim e shtypjes së vazhdueshme mundëson dhe normalizon dhunën seksuale dhe me bazë gjinore – përfshirë abuzimin, ngacmimin, ndalimin arbitrar dhe detyrimin nga ana e talebanëve, si dhe dhunën brenda familjeve dhe komuniteteve.

Ne bëjmë thirrje për përmbysjen e menjëhershme të këtyre ligjeve, politikave dhe praktikave flagrante dhe theksojmë se, pas pothuajse pesë vitesh, talebanët nuk kanë ndërmarrë asnjë hap për të rishikuar qasjen e tyre.

Sot, riafirmojmë angazhimin tonë të thellë dhe të qëndrueshëm për të mbrojtur të drejtat e të gjitha grave dhe vajzave në Afganistan. Ne mbështesim përpjekjet për përgjegjshmëri ndaj shkeljeve të vazhdueshme të të drejtave të njeriut nga talebanët dhe bëjmë thirrje për rivendosjen e qeverisjes së mirë dhe shtetit të së drejtës.

Në thirrjen tonë për drejtësi, ne japim mbështetjen tonë të plotë për përfshirjen dhe fuqizimin e zërave të të gjitha grave dhe vajzave në Afganistan dhe kërkojmë pjesëmarrjen e tyre të plotë, të barabartë dhe kuptimplotë në të ardhmen e vendit.