Ambasadorja Eglantina Gjermeni përfaqësoi Shqipërinë në diskutimin e nivelit të lartë të organizuar nga Zyra e Kombeve të Bashkuara për Drogën dhe Krimin (UNODC), me rastin e Ditës Ndërkombëtare për Parandalimin dhe Luftimin e të Gjitha Formave të Krimit të Organizuar Ndërkombëtar.
Ngjarja, e zhvilluar në Vjenë, përkujtoi 25-vjetorin e Konventës së Kombeve të Bashkuara kundër Krimit të Organizuar Ndërkombëtar (UNTOC) – Konventa e Palermos – dhe mblodhi së bashku krerë shtetesh, diplomatë, liderë të rinj dhe ekspertë për të reflektuar mbi përpjekjet globale në parandalimin dhe luftimin e krimit të organizuar.
Morën pjesë Sh.T.Z. Alexander Van der Bellen, President i Austrisë, dhe Sh.T.Z. Sergio Mattarella, President i Italisë, duke lidhur simbolikisht Vjenën dhe Palermon – qytetin ku Konventa jeton dhe atë ku ajo ka lindur.
Duke marrë pjesë në diskutim së bashku me ambasadorë të tjerë që përfaqësonin pesë grupet rajonale të Kombeve të Bashkuara, Ambasadorja Gjermeni reflektoi mbi rrugëtimin e Shqipërisë në forcimin e shtetit të së drejtës dhe përafrimin e përpjekjeve kombëtare me Konventën e Palermos.
“Reforma në drejtësi në Shqipëri ka qenë një nga proceset më të vështira dhe më transformuese në historinë e vendit tonë,” u shpreh Ambasadorja Gjermeni. “Për herë të parë në 113 vite shtet, drejtësia në Shqipëri vepron në mënyrë të pavarur dhe e lirë nga ndikimi i qeverisë. Ky arritje nuk ka ardhur lehtë, por është dëshmi e asaj që vullneti politik i qëndrueshëm dhe guximi mund të sjellin”.
Ajo theksoi se Shqipëria e konsideron Konventën e Palermos si një gur themeli të reformave ligjore dhe institucionale kundër krimit të organizuar, të mbështetur nga bashkëpunimi aktiv me EUROPOL, EUROJUST, Zyrën e Prokurorit Publik Evropian dhe nisma rajonale si RAI.
Ambasadorja Gjermeni gjithashtu vuri në dukje Strategjinë dhe Planin Kombëtar të Veprimit 2026–2030 për Parandalimin dhe Luftën kundër Krimit të Organizuar dhe të Rëndë, duke theksuar fokusin e tyre ndaj kërcënimeve të reja si krimi kibernetik, pastrimi i parave dhe trafiku i qenieve njerëzore.
“Rrugëtimi ynë tregon se kur udhëheqja është e vendosur, institucionet janë të guximshme dhe solidariteti rajonal është i sinqertë, edhe realitetet më të rrënjosura mund të ndryshojnë,” shtoi ajo.
Duke iu referuar formave të reja të krimit të organizuar në Evropën Juglindore, Ambasadorja Gjermeni theksoi ndikimin në rritje të digjitalizimit, kërcënimeve kibernetike dhe rrjeteve të paligjshme financiare, të cilat tejkalojnë gjithnjë e më shumë kufijtë. Ajo vlerësoi punën e gjatë të UNODC në Shqipëri dhe Ballkanin Perëndimor dhe rikonfirmoi angazhimin e Shqipërisë si përfituese dhe donatore në Programin Rajonal të UNODC për Evropën Juglindore 2024–2029.
Duke përmbyllur fjalën e saj, Ambasadorja Gjermeni theksoi se përvoja e Shqipërisë tregon se veprimi i përbashkët, vlerat e përbashkëta dhe qëndrueshmëria mund të forcojnë shoqëritë përballë krimit të organizuar.
