Ambasadorja Majlinda Frangaj, më 26 janar 2024, u prit në një takim në Biblotekën Apostolike të Vatikanit nga Don Mauro Mantovani, Prefekt i këtij istitucioni. Në fokus të bisedimeve, bashkëpunimi midis Ambasadës së Republikës së Shqipërisë dhe Biblotekës Apostolike të Vatikanit, për kërkimin e dokumentave që kanë të bëjnë me Shqipërinë. Kujtojmë se, në Biblotekën e Vatikanit ndodhet Meshari i priftit shqiptar Dom Gjon Buzukut (1555), që deri më sot njihet si vepra e parë e llojit dhe njëkohësisht si i pari monument letrar i botuar në gjuhën shqipe. “Jam i kënaqur për këtë iniciative – u shpreh Prefekti – pasi dhe për ne është e rëndësishme të vlerësohet trashëgimia kulturore”.
Don Mauro Mantovani, ish-Rektor i Universitetit Papnor Salesian, u emërua Prefekt i Bibliotekës Apostolike të Vatikanit, nga Ati i Shenjtë Papa Françesku, më datë 14 shkurt 2023. Biblioteka Apostolike e Vatikanit është një instrument i shquar i Kishës për zhvillimin dhe përhapjen e kulturës në mbështetje të veprimtarisë të Selisë së Shenjtë. Ka për detyrë, nëpërmjet seksioneve të ndryshme të saj, të mirëpresë dhe të ruajë një trashëgimi shumë të pasur të shkencës dhe artit dhe t’ua vërë në dispozicion studiuesve.
