Me rastin e ndarjes nga jeta të Atit të Shenjtë Papa Françeskut, më datë 21 prill 2025, Presidenti i Republikës së RSH-së SH.T.Z. Bajram Begaj me bashkëshorten, të shoqëruar nga Ministri për Evropën dhe Punët e Jashtme z. Igli Hasani, Ambasadorja Majlinda Frangaj si dhe znj. Adea Pirdeni, Ministër i Shtetit për Aministratën Publike dhe Antikorrupsionin, morën pjesë në Meshën e funeralit, e cila u mbajt më datë 26 prill 2025, në Bazilikën e Shën Pjetrit në Vatikan.
Delegacioni shqiptar (si të gjithë delegacionet) u prit në “Porta della Preghiera – Dera e Lutjes” së Bazilikës nga ish-Sekretari i Shtetit të Vatikanit Hirësia Tij Kardinali Pietro Parolin. Në vijim, homazh pranë arkivolit të Papës dhe pjesmarrja në Meshë.
Ishin mbi 250,000 besimtarë që morën pjesë në funeralin e Papa Françeskut në Sheshin e Shën Pjetrit, ku gjithashtu morën pjesë 166 krerë shtetesh dhe delegacione ndërkombëtare, përfshirë krerë shtetesh si Presidenti i SHBA-së Donald Trump dhe homologu i tij ukrainas Volodymyr Zelensky. Pjesëmarrësit përfshinin gjithashtu figura të shquara evropiane, ku Presidenten e Komisionit Evropian Ursula von der Leyen, Presidentin francez Emmanuel Macron dhe Kryeministrin britanik Keir Starmer. Me kaq shumë udhëheqës botërorë të pranishëm, funerali i Papa Françeskut është bërë një nga takimet më të rëndësishme ndërkombëtare të vitit. Renditja e pozicioneve në parvisin e Bazilikës së Shën Pjetrit në Vatikan, ishte në të djathtë të altarit duke parë fasadën, sipas alfabetit frances, që është gjuha e diplomacisë vatikanase.
Gjithashtu, morën pjesë në ceremoninë mortore kardinalë, peshkopë, priftërinj, rregulltarë, murgesha, ambasadorë, përfaqësues të Judaizmit dhe Islamit, familje, të varfër, emigrantë, të rinj dhe fëmijë.
“Të gjithë, të gjithë, të gjithë” erdhën për t’i bërë nderimet e fundit një Pape që ishte gjithmonë “midis popullit” dhe “me zemrën e tij të hapur për të gjithë”, siç tha gjatë predikimit të Meshës Kardinali Giovanni Battista Re, Dekan i Kolegjit të Kardinalëve, i cili ishte Kardinali që kryesoi Meshën e funeralit. “Përballë luftërave, Françesku është lutur pa pushim për paqe. Ai na kujtoi me forcë se të gjithë jemi vëllezër”, pohoi Kardinali Re gjatë homelisë.
Tipare të personalitetit të Jorge Mario Bergoglio-s, të frymëzimit të tij baritor, të “vëmendjes së tij të theksuar ndaj njerëzve në vështirësi” dhe të aftësisë së tij për t’u shpenzuar “pa masë”, së bashku me momentet e spikatura të pontifikatit të tij intensiv, u ndërthurën në homelinë e Kardinalit Re.
Arkivoli i vendosur në një platformë në qendër të sheshit, me Ungjillin sipër, i shfletuar nga era siç ndodhi në funeralin e paraardhësit të tij, Gjon Pali II, njëzet vjet më parë, lotët e popullit dhe të të afërmve të gjakut; radha e gjatë që gjarpëronte nga Shën Pjetri në Castel Sant’Angelo, ku shumë njerëz e kishin pritur ngjarjen që nga nata e kaluar. Ati i Shenjtë Françesku kishte shprehur më parë në testamentin e tij, vullnetin në lidhje me vendin e varrimit: “Gjithmonë ia kam besuar jetën time dhe shërbesën time meshtarake dhe episkopale Nënës së Zotit tonë, Marisë më të Shenjtë. Prandaj, kërkoj që eshtrat e mia të prehen duke pritur ditën e ringjalljes në Bazilikën Papnore të Santa Maria Maggiore”.
George Mario Bergoglio është Papa i 266-të i Kishës Katolike. I lindur në kryeqytetin argjentinas Buenos Aires, më 17 dhjetor 1936, ai u bë papa i parë nga kontinenti amerikan dhe papa i parë jo-evropian në gati 1,000 vjet, i cili u zgjodh më 13 mars 2013.
Kujtimi i tij mbetet në zemër të Kishës dhe të mbarë njerëzimit.
