Sot, datë 8 maj 2025 në orën 18:07, tymi i bardhë nga oxhaku i Kapelës Sistinë, shenjë se 133 kardinalët në Konklavë zgjodhën Papën e ri, i cili është Kardinali Robert Francis Prevost si Ipeshkëvi i 267-të i Romës. “Është i bardhë! Është i bardhë! “Habemus Papam” i parë u brohorit nga të pranishmit në Sheshin e Shën Pjetrit – rreth 100 mijë – me shfaqjen e parë të tymit të bardhë. Edhe Ambasadorja Majlinda Frangaj e pranishme në Sheshin e Shën Pjetrit për të ndjekur nga afër zgjedhjen e Papës së ri. Askush nuk e dinte emrin e Papës së ri për më shumë se një orë, vetëm kardinalët në Kapelën Sistinë.

Rënia e kambanave festive të Bazilikës shërbeu si sfond për britmat e njerëzve që duartrokitën daljen e Kardinal Protodiakonit, Dominique Mamberti, i cili ishte përgjegjës për shpalljen e formulës latine të shpalljes.

Në orën 19:12, nga Lozha Qendrore e Bazilikës së Shën Pjetrit në Vatikan, Kardinali Protodiakon  Dominique Mamberti u shfaq për t’i komunikuar të pranishmëve në Sheshin e Shën Pjetrit zgjedhjen e Papës së ri dhe formulën e shumëpritur:  “Annuntio vobis gaudium magnum: habemus Papam! Ju njoftoj një gëzim të madh: ne kemi Papën!”.

Kardinali Protodiakon Dominique Mamberti me këtë formulë latine, i komunikoi Romës dhe mbarë botës emrin e Pasardhësit të ri të Pjetrit: “Eminentissimum ac Reverendissimum Dominum, Dominum Cardinalem Robertum Franciscum Prevost, qui sibi nomen imposuit Leone XIV – Më i shquari dhe më i nderuari  Robert Francis Prevost, Kardinal i Kishës së Shenjtë Romake, që zgjodhi emrin e Leonit XIV”. Ai është Papa i parë Augustinian në histori.

Papa i ri Leone XIV,  nga Lozha qendrore e Bazilikës së Shën Pjetrit në Vatikan,  përcolli këtë përshëndetje Romës dhe botës:

“Paqja qoftë me ju të gjithë!

Të dashur vëllezër e motra, kjo është përshëndetja e parë e Krishtit të Ngjallur, Bariut të Mirë që dha jetën e tij për grigjën e Perëndisë. Edhe unë do të doja që kjo përshëndetje paqeje të hynte në zemrat tuaja, të arrinte në familjet tuaja, te të gjithë njerëzit, kudo që janë, te të gjithë popujt, në mbarë tokën. Paqja qoftë me ju!

Kjo është paqja e Krishtit të Ngjallur, një paqe e çarmatosur dhe një paqe çarmatosëse, e përulur dhe këmbëngulëse. Vjen nga Zoti, Zoti që na do të gjithëve pa kushte. Ende e mbajmë në vesh atë zë të dobët, por gjithmonë të guximshëm të Papa Françeskut që bekon Romën!

Papa që bekoi Romën ia dha bekimin e tij botës, të gjithë botës, atë mëngjes të Pashkëve. Më lejoni të vazhdoj me të njëjtin bekim: Zoti na do, Zoti ju do të gjithëve dhe e keqja nuk do të mbizotërojë! Ne të gjithë jemi në duart e Zotit. Prandaj, pa frikë, të bashkuar dorë për dore me Zotin dhe me njëri-tjetrin, le të ecim përpara. Ne jemi dishepuj të Krishtit. Krishti na paraprin. Bota ka nevojë për dritën e saj. Njerëzimi ka nevojë për Të si urë që Zoti dhe dashuria e Tij ta arrijnë. Na ndihmoni edhe ne, dhe pastaj njëri-tjetrin, të ndërtojmë ura, me dialog, me takime, duke na bashkuar të gjithëve për të qenë një popull i vetëm, gjithmonë në paqe. Faleminderit Papa Françeskut!

Gjithashtu, dua t’i falënderoj të gjithë vëllezërit e mi kardinalë që më kanë zgjedhur të jem Pasardhësi i Pjetrit dhe të ecim së bashku me ju, si një Kishë e bashkuar që kërkon gjithmonë paqen, drejtësinë, duke u përpjekur gjithmonë të punojmë si burra dhe gra besnikë ndaj Jezu Krishtit, pa frikë, për të shpallur Ungjillin, për të qenë misionarë.

Unë jam bir i Shën Agustinit, një augustinian, i cili tha: “Me ju jam i krishterë dhe për ju një peshkop”. Në këtë kuptim, të gjithë mund të ecim së bashku drejt atdheut që Zoti ka përgatitur për ne.

Një përshëndetje e veçantë për Kishën e Romës! Duhet të kërkojmë së bashku si të jemi një Kishë misionare, një Kishë që ndërton ura, dialog, gjithmonë e hapur për të pritur si ky shesh me krahë hapur. Të gjithë, të gjithë ata që kanë nevojë për bamirësinë tonë, praninë tonë, dialogun tonë dhe dashurinë tonë.

Në përfundim, indulgjenca plenare iu dha atyre që në atë moment morën bekimin e parë të Pasardhësit të ri të Pjetrit. Një udhëtim fillon, një histori fillon, një epokë e re fillon. “Rroftë Papa!”