Ministri për Evropën dhe Punët e Jashtme, Igli Hasani, priti në një takim të Dërguarin e Posaçëm të Francës për Ballkanin Perëndimor, Rene Troccaz.
Diskutimet u fokusuan në marrëdhëniet dypalëshe, hapat e ndërmarra për bashkëpunimin strategjik dhe zhvillimet e fundit në rajon duke theksuar rëndësinë e përpjekjeve bashkëpunuese për të nxitur sigurinë dhe stabilitetin e Ballkanit Perëndimor.
Ministri Hasani shprehu mirënjohjen për kontributin e çmuar të Francës në procesin e anëtarësimit të Shqipërisë dhe Ballkanit Perëndimor në BE, përfshirë ekspertizën dhe burimet e përkushtuara në forcimin e institucioneve dhe përafrimin e politikave me standardet e BE- së.
Kryediplomati shqiptar vlerësoi investimet franceze në Shqipëri, teksa theksoi se ekziston mundësia për një avancim të mëtejshëm të marrëdhënieve ekonomike.