Republika e Shqipërisë dhe Rumania dhe festojnë sot 30-vjetorin e nënshkrimit të Traktatit të Mirëkuptimit, Bashkëpunimit dhe Fqinjësisë së Mirë. (11 maj 1994, Bukuresht).
Ministri për Evropën dhe Punët e Jashtme i Republikës së Shqipërisë, SH.T.Z Igli Hasani dhe Ministrja e Punëve të Jashtme e Rumanisë, SH.T.ZNJ Luminița Odobescu, me këtë rast shkëmbyen mesazhe urimi, ku u nënvizua partneriteti solid mes dy vendeve,  bazuar në respektin dhe mirëkuptimin reciprok, duke pasuruar më tej miqësinë historike.
Gjatë këtyre 30 viteve, lidhjet midis dy shteteve bazohen në një traditë të fortë ku historia ndërthuret me një trashëgimi të përbashkët kulturore dhe lidhje të ngushta mes popujve, duke përfshirë këtu edhe minoritetet, të cilët i lidhin fort dy shtetet përtej gjeografisë.
Rumania është dhe do të mbetet një mbështetëse e vendosur e rrugës evropiane të Republikës së Shqipërisë.
Shqipëria dhe Rumania, si aleatë të NATO-s dhe partnerë evropianë, janë të përkushtuar vazhdimisht për të kontribuar së bashku për një Evropë të fortë, të begatë dhe të sigurt.
Dy vendet i kanë vendosur marrëdhëniet diplomatike 111 vjet më parë (viti 1913).