28 qytetarë nga Shqipëria dhe Kosova, që udhëtuan javën e kaluar për arsye pune apo turistike në Lindjen e Mesme janë shëndoshë e mirë.
Ministri për Evropën dhe Punët e Jashtme, Igli Hasani, bëri me dije për mediat se përmes koordinimit të pandërprerë me ambasadat e Republikës së Shqipërisë në Izrael e Egjipt, u organizua kthimi i të gjithë qytetarëve shqiptarë, fluturimet e të cilëve u anulua për shkak të situatës së tensionuar në rajon.
“10 nxënës që studiojnë në shkollat ndërkombëtare në Izrael, 7 prej të cilëve nga Shqipëria dhe 3 nga Kosova, së bashku me 5 punonjës të Ministrisë së Turizmit dhe familjarë të tyre, kanë mbërritur në Qipro. Sot në mbrëmje të 15 qytetarët që u larguan nga Tel Aviv udhëtojnë drejt Tiranës e Prishtinës”, u shpreh kryediplomati shqiptar, i cili falënderoi diplomatët e MEPJ për ndihmën e dhënë këto ditë.
MEPJ po vijon punën për kthimin në atdhe edhe të dy qytetarëve, të cilët nuk mundën dot të përgjigjeshin në telefon të dielën, ndërsa përgatitej fluturimi i radhës.
Gjithashtu, 13 turistë shqiptarë janë larguar mbrëmjen e djeshme nga Jordania, e prej disa orësh janë pranë familjeve të tyre në atdhe.