Dritan Tola

Ambasadori Dritan Tola ka lindur në Tiranë më 1970. Ai ka studiuar për gjuhë-letërsi frënge dhe për drejtësi, si edhe ka kryer kualifikime pasuniversitare në vende të ndryshme të Evropës.

Karrierën profesionale e ka filluar në vitin 1992 dhe që atëherë ka punuar në Komisionin Evropian në Tiranë dhe në Bruksel dhe në Delegacionin e Bashkimit Evropian në Shqipëri. Ai ka ushtruar funksione të ndryshme në institucionet evropiane, si këshilltar politik, ka ndjekur çështje të ndryshme politike të marrëdhënieve BE-Shqipëri, çështje të integrimit evropian, zhvillimet evropiane dhe rajonale, si edhe ka qenë përgjegjës programesh evropiane në fushën e të drejtave të njeriut dhe shoqërisë civile, administratës publike, mjedisit, etj.

Në mars të vitit 2013, ai mori detyrën si Ambasador i Republikës së Shqipërisë në Francë dhe në Monako (jo-rezident) dhe Përfaqësues i Presidentit të Republikës pranë Organizatës Ndërkombëtare të Frankofonisë.

Ai ka qenë anëtar bordesh drejtuese të institucioneve të ndryshme, si Fondacioni Soros, Shkolla Shqiptare e Studimeve Politike, programet e zhvillimit të Bankës Botërore, PNUD-it (OKB), Qendrës Evropiane Rajonale të Mjedisit, etj. Është anëtar themelues i “Lions Club Albania” dhe “Retromobile Club Albania” (Klubi Shqiptar i Automobilëve Historikë).

Përveç shqipes (gjuhë amtare), Ambasadori Tola flet rrjedhshëm anglisht, frëngjisht, italisht, dhe ka njohuri bazë në gjermanisht dhe greqisht.