Më 4 shkurt 2016, në Universitetin e Strasburgut u hap një ekspozitë me fotografi nga Shqipëria, bërë nga 12 universitarë francezë, që vizituan vendin tonë gjatë vjeshtës së 2015-ës.

Në ekspozitën e çelur me këtë rast morën pjesë drejtuesit e lartë të Universitetit të Strasburgut, profesorë, stafi teknik i universitetit, si edhe përfaqësues nga Ambasada e Shqipërisë në Francë dhe nga Përfaqësia e Përhershme e Shqipërisë në Këshillin e Evropës.

Fotot e ekspozitës pasqyronin disa realitete shqiptare, si bukuritë natyrore të vendit tonë me pamje shumë të bukura nga deti dhe nga malet, gastronominë tonë, si edhe harmoninë fetare.

Fjalën e hapjes së ekspozitës e mbajti zëvendës presidenti i universitetit të Strasburgut, Profesor Michel Deneken, i cili përgëzoi universitarët e Strasburgut për ekspozitën mbi Shqipërinë, duke thënë se Universiteti i Strasburgut ka qenë historikisht i interesuar për Evropën qendrore dhe jug-lindore, si edhe ka pasur gjithmonë bashkëpunime me këto vende, në rastin e Shqipërisë në veçanti për arkeologjinë. Gjithashtu, Prof. Deneken shprehu dëshirën që të ketë më shumë bashkëpunime në të ardhmen midis Universitetit të Strasburgut dhe Universiteteve shqiptare.

Përfaqësuesja e ambasadës së Shqipërisë në Francë, Avenilda Doko, në fjalën e saj, ndër të tjera tha se është një kënaqësi për ambasadën por edhe për shqiptarët të shikojnë sesi francezët e paraqesin Shqipërinë dhe flasin për të në ambjentet universitare por edhe më tej. Promovimi i kulturës dhe turizmit shqiptar, është një nga prioritet e ambasadës, por me anë të kësaj ekspozite, ky promovim u bë edhe më mirë nga Universiteti i Strazburgut. Znj. Doko falenderoi pjesëmarrësit për interesin e tyre për Shqipërinë.

Përfaqësuesi i SPACS, Shërbimi i Promovimit Social të Universitetit të Strasburgut Z. Marc Levy tregoi përshtypjet e tij më të mira për vizitën në Shqipëri duke inkurajuar edhe kolegët e tjerë të vizitojnë Shqipërinë së shpejti.