Shqip
Français
Të dashur miq,
Mirësevini në faqen e internetit të Ambasadës së Shqipërisë në Francë. Kjo faqe ofron informacione të përditësuara mbi aktivitetet tona dhe mbi zhvillimet më të rëndësishme në lidhje me marrëdhëniet mes Shqipërisë dhe Francës. Ajo është menduar si një instrument që ndihmon në zhvillimin e marrëdhënieve dypalëshe të shkëlqyera që ekzistojnë mes dy vendeve tona.
Është bindja ime e thellë, por jam i sigurt edhe e juaja, që historia e marrëdhënieve mes Shqipërisë dhe Francës është e gjatë, dhe, do ta thoja me vendosmëri, ajo është e bukur. Ato janë marrëdhënie të hershme që kanë nisur me zbarkimin në brigjet shqiptare të Robert Guiscard-it në shekullin XI, kanë vazhduar me praninë në Shqipëri gjatë Luftës së Parë Botërore të trupave të Ushtrisë Franceze të Lindjes të gjeneralit Sarrail të cilat lanë pas tyre liceun e famshëm francez, djepin e elitave drejtuese dhe intelektuale të vendit, për të mbërritur në kohët moderne me një prani reciproke franceze në Shqipëri dhe shqiptare ne Francë, prani kjo politike, ekonomike, tregtare, universitare dhe gjuhësore, e cila falë përpjekjeve të jashtëzakonshme dhe të respektueshme të të gjithë shqiptarëve dhe francezëve qe bartin stafetën e këtyre marrëdhënieve dhe të kësaj miqësie, vazhdon të jetojë dhe të zhvillohet sot e kësaj dite. Shqipëria është gjithashtu, fatmirësisht, një vend anëtar i Frankofonisë dhe kjo jo thjesht në letra por duke qenë shumë aktive. Kjo është gjithashtu dëshmi e një dashurie të sinqertë për Francën që vazhdon të jetë e gjallë te shqiptarët dhe te shqiptaret e ditëve tona.
Franca është një vend me rrezatim botëror, një vend i madh evropian, një prej themelueseve dhe sot një nga shtyllat kryesore të Bashkimit Evropian. Nga ana tjetër, Shqipëria është një vend me vokacion evropian të pakthyeshëm, pavarësisht vështirësive objektive, që natyrisht kanë të bëjnë me etapat e saj të zhvillimit. Politika e brendshme dhe e jashtme e të gjitha qeverive shqiptare është e lidhur thellësisht me këtë synim dhe me vlerat e parimet themelore të familjes evropiane, e të cilat janë paqja, demokracia, respektimi i të drejtave të njeriut, prospepriteti dhe fqinjësia e mirë. Sepse, sikurse e ka thënë edhe njeriu i madh i letrave shqipe, Ismail Kadare, “Evropa është gjendja natyrore e Shqipërisë, e vetmja gjendje e saj”. Dhe unë ne ndaj plotësisht këtë bindje me të.
Ju ftoj të gjithëve, të dashur miq dhe admirues francezë të Shqipërisë, shqiptarë të Francës dhe francezë të Shqipërisë, të bashkoni përpjekjet, edhe me Ambasadën dhe ekipin e saj, për të dhënë kontributin tuaj që ky vokacion evropian e paqësor, si dhe kjo miqësi tradicionale të vazhdojë, të thellohet dhe të gjejë fusha të reja zbatimi. Kam besimin e fortë që ndonëse marrëdhëniet aktuale mes Shqipërise dhe Francës janë të shkëlqyera, ato mund të shkojnë më tej, në të gjitha nivelet, politike, ekonomike si dhe kulturore e intelektuale.
E konsideroj praninë e atyre mijëra shqiptarëve që jetojnë e punojnë në Francë, ndër të cilët disa me emër dhe të tjerë më pak të njohur por po aq të respektuar, si një aset të vyer në plotësimin e detyrës sonë. Ata kanë qenë dhe do të vazhdojnë të jenë ambasadorët më të mirë të Shqipërisë.
Ambasada jonë ndodhet në adresën 57, avenue Marceau, në lagjen e 16-të të Parisit. Diplomatët e saj dhe bashkëpunëtorët ndjekin çdo ditë çështjet politike, ekonomike, tregtare, të frankofonisë, kulturore, konsullore, protokollare, ushtarake dhe policore. Ambasada ruan kontakte të ngushta me shoqatat franceze dhe ato të shqiptarëve në Francë si dhe me konsujt e nderit të Shqipërisë në Lyon, Metz dhe Monaco.
Ambasadori përfaqëson Shqipërinë gjithashtu pranë Principatës së Monakos dhe pranë Organizatës Ndërkombëtare të Frankofonisë.
Faqja jonë në internet ashtu si dhe vetë Ambasada, janë vende pritjeje për njerëzit por gjithashtu për ide dhe iniciativa. Ju ftoj të na informoni për projektet tuaja dhe sugjerimet që do të kontribuojnë për një miqësi edhe më të fortë e të dobishme për secilin nga vendet tona.
Dritan Tola
Ambasador i Shqipërise në Francë
