Më 28 shkurt 2017, Ministri i Brendshëm francez, Z. Bruno LE ROUX, vizitoi Tiranën për tu takuar me homologun e tij shqiptar Z. Saimir Tahiri.

Bisedimet mes ministrave u fokusuan kryesisht në luftën kundër terrorizmit dhe krimit të organizuar si dhe luftën kundër emigracionit të parregullt.

Këto bisedime çuan në zhvillimin e mëtejshëm të rrugëve të bashkëpunimit në të gjitha çështjet e diskutuara, veçanërisht në fushat e: luftës kundër terrorizmit dhe radikalizmit; luftën kundër emigracionit të parregullt; luftën kundër krimit të organizuar sidomos trafikut të drogës, vjedhjeve, trafikut të armëve dhe zbardhjes së parave.

Kjo vizitë u krye në kuadër të dëshirës së përbashkët të intensifikimit të marrëdhënieve dypalëshe mes Francës dhe Shqipërisë, dhe do të kulmojë me nënshkrimin pas disa ditësh, nga kryeministrat e dy vendeve, të një marrëveshje kuadër të bashkëpunimit dhe partneritetit.

Ministri Tahiri: “ngritja e grupeve të përbashkëta me oficerë shqiptarë dhe oficerë francezë, të cilët do bëjnë hetime të përbashkëta në kuadër të luftës kundër krimit të organizuar, trafiqeve të paligjshme, parave e aseteve kriminale”.

Le Roux ndër të tjera u shpreh se: «vendet tona gjenden përballë të njëjtave kërcënime. Një aksion frytdhënës kundër këtyre kërcënimeve kërkon një bashkëpunim të ngushtë në frymën e një përgjegjësie të përbashkët: asnjë vend nuk mund t’i luftojë i vetëm këto sfida».