Kuvajti i jep rëndësi shtimit të lidhjeve tregtare me Shqipërinë, u shpreh Zv. Kryeministri dhe Ministri i Tregtisë dhe Industrisë Abdulmohsen Al-Madaj, pasi u takua të martën në Kuvajt, me Zv.Kryeministrin e Shqipërisë z.Niko Peleshi. Kuvajti, për më tepër, tha Al-Madaj, pret edhe vizitën e Kryeministrit të Shqipërisë në shtator, ku edhe do të nënshkruhen disa marrëveshje tregtare me Kuvajtin. Në një deklaratë të ngjashme pas takimit me Al-Madaj, i cili është edhe në funksionin e Ministrit të Arsimit, Peleshi tha që vizita e tij është pjesërisht edhe parapërgatitje e vizitës së Kryeministrit shqiptar në shtator. Më tej, Peleshi vuri në dukje faktin që vendi i tij ofron mundësi të mëdha investimi nga të cilat mund të përfitojnë qytetarët kuvajtjanë, duke cituar se marrëdhëniet Kuvajt-Shqipëri janë intensifikuar në njëzet vitet e fundit. Ai u shpreh se do të vizitonte një numër të madh ministrish, agjensish dhe autoritetesh kuvajtjane, ndër të tjerë edhe Autoritetin Kuvajtjan për Investimet, Këshillin e Lartë për Planifikimet, Dhomën e Tregtisë dhe Industrisë së Kuvajtit, dhe Autoritetin Publik për Çështjet e Bujqësisë dhe Peshkimit.