Ministrja për Evropën dhe Punët e Jashtme, Olta Xhaçka, drejtoi sesionin e Këshillit Ministror të OSBE-së që u mbajt në Suedi, në cilësinë e trojkës kryesuese të kësaj organizate për vitet 2019-2021.
Ministrja Xhaçka e cilësoi nismën 'Ballkani i Hapur' si një mjet efektiv për të luftuar pasigurinë dhe paqëndrueshmërinë, që po rriten gjithnjë e më shumë në hapësirën e OSBE-së. 
Sipas saj, bashkëpunimi dhe dialogu janë e vetmja mënyrë për t'i dhënë fund konflikteve dhe t'i hapin rrugë negociatave. 

Ministrja për Evropën dhe Punët e Jashtme, Olta Xhaçka, mori pjesë në konferencën e nivelit të lartë me temë “E ardhmja e grave, paqes dhe sigurisë në Shqipëri”, organizuar nga prezenca e OSBE-së në Tiranë. 
Ministrja Xhaçka theksoi se Shqipëria ka përparuar shumë në rritjen e përfshirjes së rolit të gruas në fusha të ndryshme, teksa prezantoi edhe disa statistika lidhur me këtë çështje.  

Ministrja për Evropën dhe Punët e Jashtme, Olta Xhaçka, zhvilloi një takim me Ministren e Mbretërisë së Bashkuar për Evropën, Wendy Morton. Në fokus të diskutimeve ishte fuqizimi i bashkëpunimit dypalësh me fokus në marrëdhëniet ekonomike dhe tregtare, si dhe dakordësimi për të bashkëpunuar për prioritetet në Këshillin e Sigurimit të OKB-së. 
Ministrja Xhaçka theksoi se Mbretëria e Bashkuar është një mik i rëndësishëm i Shqipërisë dhe aleat i Ballkanit Perëndimor. 

Në kuadër të pjesëmarrjes në punimet e sesionit të 76-të të Asamblesë së Përgjithshme të OKB-së, Ministrja për Evropën dhe Punët e Jashtme, Olta Xhaçka, mori pjesë në diskutimin mbi situatën në Afganistan të organizuar nga Ministria daneze e Punëve të Jashtme dhe Instituti Ndërkombëtar i Paqes. 
Ministrja Xhaçka u shpreh se Shqipëria e ka treguar përkushtimin e saj ndaj qytetarëve të Afganistanit, duke qenë vendi i parë që u ofroi strehim refugjatëve.