Më 8 prill 2025, Ambasadorja Mimoza Halimi priti Ambasadorin e ri të Portugalisë në Poloni, Z. Mario Miranda Duarte, në ambientet e Ambasadës së Republikës së Shqipërisë në Varshavë.
Gjatë takimit, dy ambasadorët shkëmbyen mendime mbi marrëdhëniet dypalëshe mes Shqipërisë dhe Portugalisë, brenda kontekstit të pranisë së tyre diplomatike në Poloni. Ata shqyrtuan mundësitë për bashkëpunim, veçanërisht në fushat e ekonomisë, turizmit dhe kulturës.
Në bisedë, u diskutua gjithashtu procesi i zgjerimit të Bashkimit Evropian, përparimi i Shqipërisë në rrugën e integrimit dhe pritshmëritë për Presidencën polake të Këshillit të Bashkimit Evropian.
Ambasadorja Halimi shprehu mirënjohjen e saj të sinqertë për mbështetjen e vazhdueshme dhe të vlefshme të Portugalisë në përpjekjet e Shqipërisë për integrim në Bashkimin Evropian.