Ministrja për Çështjet Evropiane e Suedisë, Jessica Rosencrantz zhvilloi, më 10 mars 2025, një vizitë zyrtare në Tiranë, ku u takua ndër të tjera me Kryeministrin Edi Rama dhe Ministrin për Evropën dhe Punët e Jashtme Igli Hasani. Gjatë takimit me Ministrin Hasani u theksua bashkërisht bashkëpunimi dhe lidhjet e frytshme mes dy vendeve , si dhe angazhimin e përbashkët për të ruajtur e forcuar vlerat demokratike, paqen dhe sigurinë në Evropë.
Ministri Hasani përfitoi nga rasti që të shprehte mirënjohjen e vendit tonë ndaj autoriteteve suedeze për përkrahjen dhe ndihmën e fuqishme përgjatë viteve për integrimin e Shqipërisë në BE. Suedia ka qenë përherë një mbështetëse e pandalshme ndaj Shqipërisë për reformat institucionale, demokratizimin, mirëqeverisjen dhe asistencën teknike gjatë rrugëtimit tonë evropian.
Igli Hasani, në një kohë sfidash të mëdha gjeopolitike, nënvizoi vendosmërinë e Shqipërisë për të përmbushur procesin e reformave gjithëpërfshirëse dhe transformuese për t’u përafruar në kohën e duhur me standardet evropiane, si dhe rolin e saj si kontribuuese e rregullt në bashkëpunimin, stabilitetin dhe kohezionin e rajonit tonë.
Në përfundim të takimeve, Ministrja JessicaRosencrantz u shpreh se Shqipëria është një nga vendet kryesore në procesin e anëtarësimit në BE, me objektiva ambiciozë dhe rezultate të forta.


