Bukuresht, Rumani, 26 mars 2025 – Zëvendësministrja për Evropën dhe Punët e Jashtme, znj. Megi Fino ka zhvilluar një takim kortezie me Ministrin e Jashtëm rumun, z. Emil Hurezeanu, takim i cili u fokusua në diskutimin mbi mundësitë e thellimit të bashkëpunimit dypalësh, rajonal dhe shumëpalësh mes Shqipërisë dhe Rumanisë.

Në kuadër të konsultimeve diplomatike u vlerësua angazhimi i ndërsjellë për të avancuar me agjendën e përbashkët mes dy vendeve tona.

Takimi me Ministrin Hurezeanu u pasua nga konsultimet e frytshme me Sekretaren e Shtetit për Çështjet e BE-së znj. Clara Staicu. Gjatë këtij takimi, palët shkëmbyen mendime mbi marrëdhëniet dypalëshe, me theks të veçantë në forcimin e bashkëpunimit politik, ekonomik dhe kulturor. U diskutua gjithashtu për çështje të rëndësishme rajonale dhe ndërkombëtare, duke përfshirë procesin e integrimit evropian të Shqipërisë dhe sfidat aktuale me të cilat përballet rajoni i Ballkanit Perëndimor.

Delegacionet theksuan rëndësinë e vazhdimit të bashkëpunimit të ngushtë për të avancuar prioritetet e përbashkëta dhe riafirmuan angazhimin e tyre për të thelluar marrëdhëniet miqësore ndërmjet Shqipërisë dhe Rumanisë.Konsultimet diplomatike midis dy vendeve konfirmuan frymën e mirëkuptimit dhe bashkëpunimit, duke shërbyer si një platformë e rëndësishme për të forcuar partneritetin dhe për të adresuar sfidat rajonale dhe globale.