Ambasadorja e Shqipërisë në Turqi, Blerta Kadzadej, u prit në një takim nga Zëvendëspresidenti turk, Cevdet Yılmaz, ku u diskutua forcimi i mëtejshëm i marrëdhënieve strategjike mes dy vendeve, si dhe zhvillimet rajonale dhe ndërkombëtare.

Takimi u zhvillua në një atmosferë miqësore dhe u fokusua në rolin e diplomacisë për përballimin e sfidave globale. Yılmaz theksoi se Turqia mbështet dialogun dhe ndërmjetësimin për zgjidhjen e konflikteve, duke nënvizuar rëndësinë e uljes së tensioneve në rajone të ndryshme, përfshirë Lindjen e Mesme.

Gjatë bisedës u trajtuan edhe tensionet ndërkombëtare, ku pala turke vuri theksin te nevoja për zgjidhje diplomatike. Po ashtu, u vlerësua rëndësia e Platformës së Paqes në Ballkan për forcimin e bashkëpunimit rajonal.

Në planin ekonomik, u nënvizua niveli i mirë i bashkëpunimit dhe potenciali për rritje të mëtejshme të investimeve dhe projekteve të përbashkëta. U diskutua edhe zgjerimi i lidhjeve ajrore dhe organizimi i takimeve të ardhshme dypalëshe në nivel të lartë.

Bisedimet përfshinë gjithashtu bashkëpunimin në mbrojtje, arsim dhe kulturë, si dhe çështje të sigurisë.

Ambasadorja Kadzadej vlerësoi marrëdhëniet e ngushta Shqipëri–Turqi, duke theksuar rolin e rëndësishëm të investimeve turke dhe bashkëpunimit në fusha të ndryshme.

Takimi konfirmoi nivelin e lartë të partneritetit strategjik dhe angazhimin e të dy vendeve për të forcuar më tej bashkëpunimin dhe stabilitetin rajonal.