Ambasador Uran Ferizi

Ambasador Ferizi mori detyrën e tij aktuale në janar të vitit 2024. Ai vjen me një përvojë nga fusha e financës dhe kërkimit shkencor. Fazat e para të karrierës se tij profesionale i zhvilloi në sektorin privat, ku punoi në studime fizibiliteti për projekte të mëdha infrastrukturore, përfshirë Aeroportin Heathrow të Londrës dhe Aeroportin e Singaporit. Më pas, në bankat e investimeve, ai punoi në departamentin e tregtimit të Bear Stearns në Londër, tani JP Morgan, duke u specializuar në produkte të strukturuara me të ardhura fikse (Fixed Income Trading Desk).

Dr. Ferizi studioi Matematikë në Universitetin e Oksfordit. Për doktoraturën e tij në Neuroshkencë në University College London, ai zhvilloi modele matematikore për imazhet e trurit, duke bashkëpunuar me qendrën spitalore MIT-Harvard MGH dhe UCL National Hospital for Neurology të Mbretërisë së Bashkuar. Kërkimet e tij pasdoktorale në New York University u përqendruan në artrit dhe osteoporozë, ndërsa në Stanford University ai punoi mbi biomarkerët e hershëm për sëmundjen e Parkinsonit dhe varësinë nga substancat tek adoleshentët.

Dr. Ferizi ka lindur në Shqipëri dhe e ka formuar arsimin dhe karrierën e tij në Shqipëri, Britani dhe SHBA, duke kaluar mbi 25 vjet në këto dy të fundit. Ai është i përkushtuar në forcimin e marrëdhënieve kulturore, arsimore dhe tregtare të Shqipërisë me Britaninë dhe Irlandën.