Në Zagreb u zhvillua një mbrëmje festive për të shënuar 65-vjetorin e themelimit të Shoqatës Kulturore Shqiptare “Shkëndija”, një prej organizatave më të vjetra dhe më të rëndësishme të komunitetit shqiptar në Kroaci.

Në emër të Ambasadës së Shqipërisë, Ambasadorja Donika Hoxha përshëndeti këtë përvjetor të shënuar, duke vlerësuar rolin e Shkëndijës në ruajtjen dhe promovimin e traditave kulturore shqiptare për më shumë se gjashtë dekada. Në mbrëmje morën pjesë përfaqësues të autoriteteve lokale, miq kroatë, anëtarë të komunitetit shqiptar dhe përfaqësues të institucioneve kosovare në Kroaci.

Programi artistik i udhëhequr nga Presidentja e Shoqatës, znj. Gentiana Lleshdedaj, solli në skenë vallëzime tradicionale, këngë dhe paraqitje të fëmijëve e të rinjve, duke dëshmuar vazhdimësinë dhe energjinë e këtij komuniteti.

Ambasadorja Hoxha vlerësoi themeluesit, drejtuesit ndër vite dhe të gjithë anëtarët e Shoqatës, duke theksuar se “Shkëndija nuk është vetëm një emër — është identitet, familje dhe e ardhme”.

Evenimenti ritheksoi lidhjet e forta të komunitetit shqiptar me Kroacinë, si dhe angazhimin për të mbrojtur dhe kultivuar trashëgiminë kulturore kombëtare.