Ambasada e Republikës së Shqipërisë në Kroaci organizoi pritjen zyrtare me rastin e Festës Kombëtare të Shqipërisë, Ditës së Pavarësisë dhe Ditës së Çlirimit. Aktiviteti u zhvillua në një atmosferë të ngrohtë dhe festive, duke mbledhur së bashku përfaqësues të institucioneve kroate, trupit diplomatik, komunitetit shqiptar, biznesit dhe miqve të Shqipërisë në Kroaci.

Në fjalën e saj të përshëndetjes, Ambasadorja e Republikës së Shqipërisë në Kroaci, znj. Donika Hoxha, vlerësoi miqësinë e qëndrueshme midis Shqipërisë dhe Kroacisë dhe theksoi rëndësinë historike të 28 Nëntorit për identitetin dhe shtetësinë shqiptare. Ajo falënderoi institucionet dhe partnerët kroatë për mbështetjen e vazhdueshme ndaj Shqipërisë, veçanërisht në rrugëtimin drejt anëtarësimit në Bashkimin Evropian.

Ambasadorja Hoxha vuri në dukje rolin e rëndësishëm të komunitetit shqiptar në Kroaci si një urë miqësie mes dy vendeve, duke kontribuar në forcimin e marrëdhënieve kulturore, ekonomike dhe shoqërore.

Të pranishmit patën mundësinë të shijonin elementë të kulturës dhe traditave shqiptare përmes muzikës, artit, artizanatit dhe gatimeve tradicionale. Pritja u shoqërua nga një pjesëmarrje e gjerë dhe u vlerësua si një kontribut i rëndësishëm në promovimin e imazhit të Shqipërisë dhe të komunitetit shqiptar në Kroaci.

Ambasada e Shqipërisë në Zagreb falënderon të gjithë pjesëmarrësit që nderuan festën, si dhe bashkëpunëtorët që kontribuuan në realizimin e këtij aktiviteti të rëndësishëm.