Në datat 26-28 prill 2023, Presidenti i Republikës së Shqipërisë, Sh.T.Z. Bajram Begaj dhe Zonja e Parë Armanda Begaj, zhvilluann një vizitë shtetërore në Kroaci, me ftesë të Presidentit të Republikës së Kroacisë, Sh.T.Z. Zoran Milanoviç.

Në delegacionin e kryesuar nga Presidenti Begaj, morën pjesë edhe Zëvendës Kryetari i Kuvedit, z. Agron Gjekmarkaj dhe Kryetarja e Grupit Parlamentar të Miqësisë Shqipëri – Kroaci, znj. Klodiana Spahiu. Gjatë kësaj vizite, Presidenti Begaj u shoqërua nga Ambasadori Poda.

Presidenti Begaj krahas takimit me Homologun e tij Kroat, Presidentin Milanovic, zhvilloi një takim edhe me Kryetarin e Parlamentit Republikës së Kroacisë, z. Gordan Jandrokoviç, si dhe pati një drekë pune me Kryeministrin e Kroacisë, z. Andrej Plenkoviç

Pas takimit kokë më kokë mes Presidentit Begaj dhe Presidentit Milanoviç, u vijua me takimin mes dy delegacioneve zyrtare, në përfundim të të cilit të dy presidentët patën një konferencë për shtyp. Presidenti Begaj nënvizoi rëndësinë e forcimit të mëtejshëm të partneritet strategjik midis dy vendeve, duke theksuar nevojën e zgjerimit të marrëdhënive dypalëshe, me theks të vecantë në bashkëpunimin ekonomik-tregtar, avancimin e agjendës së integrimit evropian të Shqipërisë, ku vlerësoi mbështetjen e vazhdueshme të Kroacisë, si dhe u ndal në zhvillimet rajonale.

Në takimin me Kryeparlamentarin Jandrokoviç mori pjesë edhe përfaqësuesja e minoritetit shqiptar në Parlamentin e Kroacisë, Ermina Lekaj Prljaskaj. Presidenti Begaj vlerësoi rolin e dy parlamenteve në fuqizimin e marrëdhënieve dypalëshe, duke nënvizuar kontributin e dimensionit parlamentar në rrugën e integrimit evropain të vendit.

Në drekën e punës me Kryeministrin Plenkoviç, Presidenti Begaj vlerësoi arritjet e fundit të Kroacisë në kuadër të BE-së, përkatësisht hyrjen në zonën Shengen e Eurozonë, ku nënvizoi se Kroacia mbetet shembulli më i mirë për rrugëtimin evropian të Shqipërisë. Në këtë kontekst Presidenti Begaj shprehu mirënjohjen për mbështetjen e vazhdueshme të Kroacisë në udhëtimin evropian.

Të dy bashkëbiseduesit ndanë mendimin mbi nevojën e thellimit të bashkëpunimit ekonomik dypalësh, në fusha me interes të përbashkët.

Në kuadër të kësaj vizite, Zonja e Parë Armanda Begaj u shoqërua nga Zonja e Parë e Kroacisë, Sanja Musić Milanovic, në vizitën e ekspozitës “Oton Iveković-retrospektivë”.