Donika Hoxha

Donika Hoxha shërben aktualisht si Ambasadorja e Republikës së Shqipërisë në Republikën e Kroacisë. Diplomate karriere dhe historiane, ajo është doktoruar në Historinë e Marrëdhënieve Ndërkombëtare në Universitetin La Sapienza të Romës (2010), pas një diplome Master në Gjuhë dhe Letërsi Euro-Amerikane (2005), si dhe studimeve pasuniversitare në Diplomaci në Universitetin e Maltës (2000). Ajo ka përfunduar studimet universitare në Gjuhë Angleze në Universitetin e Tiranës në vitin 1998.

Karriera e saj profesionale filloi në vitin 1998 në Ministrinë e Kulturës, Rinisë dhe Sporteve, ku ushtroi funksionin e Zëdhënëses dhe Specialistes së Marrëdhënieve me Jashtë. Më pas ajo iu bashkua Ministrisë për Evropën dhe Punët e Jashtme, ku punoi në Departamentin e Shtypit dhe Informacionit (1999–2002), dhe më pas mbajti pozicione të rëndësishme si Shefe e Protokollit dhe Këshilltare e Kryeministrit (2002), si dhe Drejtore e Diplomacisë Ekonomike, Publike dhe të Diasporës (2015–2018). Ajo gjithashtu ka qenë lektore e Anglishtes për Biznes në Universitetin e Tiranës (1998–2001).

Në përfaqësitë diplomatike të Shqipërisë jashtë vendit, Ambasadorja Hoxha ka shërbyer si Këshilltare dhe Sekretare e Parë në Ambasadën e Shqipërisë në Romë (2002–2006; 2008–2015). Në tetor të vitit 2018, ajo u emërua Ambasadore Jashtëzakonshme dhe Fuqiplotë në Republikën e Bullgarisë dhe në tetor të vitit 2019 edhe në Republikën e Moldavisë (jo-rezidente). Në nëntor 2023, në shenjë vlerësimi për kontributin e saj në forcimin e marrëdhënieve dypalëshe, ajo u nderua me Urdhrin e “Kalorësit të Madara-s”, Klasi i Parë – një nga dekoratat më të larta që jepet nga Presidenti i Republikës së Bullgarisë.

Përpara emërimit të saj aktual, ajo ka shërbyer si Drejtoreshë e Kabinetit në Ministrinë për Evropën dhe Punët e Jashtme të Republikës së Shqipërisë.

Ambasadorja Hoxha flet rrjedhshëm anglisht dhe italisht dhe zotëron njohuri të mira të gjuhës frënge. Ajo sjell në këtë detyrë një përvojë të gjerë në diplomacinë publike, bashkëpunimin kulturor dhe marrëdhëniet ndërkombëtare.