Më 20 shkurt 2015, në një ceremoni të zhvilluar në Pallatin Mbretëror Amalienborg, Christian VII, Ambasadori Kastriot Robo i dorëzoi Letrat Kredenciale Mbretëreshës së Damimarkës, Madhërisë së Saj, Margrethe II. Gjatë kësaj ceremonie Ambasadori Robo shoqërohej nga bashkëshortja.

Në vijim të ceremonisë së dorëzimit të Letrave Kredenciale, Ambasadori u prit dhe zhvilloi një bisedë me Mbretëreshën, Madhërinë e Saj, Margrethe II.

Në fjalën e tij, Ambasadori i shprehu falenderimet dhe vlerësoi bashkëpunimin shumë të mirë që ekziston mes dy vendeve tona. Ai shprehu mirënjohjen për mbështetjen që Danimarka i jep vendit tonë në procesin e integrimit euroatlantik të vendit. Ai, gjithashtu, falenderoi për asistencën dhe kontributin e vazhdueshëm që Danimarka ofron përmes projekteve të Programit Neighbourhood. Më tej, ai shprehu gatishmërinë dhe siguroi për përpjekjet e tij për thellimin e marrëdhënieve dhe zgjerimin e bashkëpunimit edhe në fusha të tjera me Daniamrkën.

Mbretëresha, Madhëria e saj Margrethe II, i shprehu Ambasadorit Robo mirëseardhjen, u interesua për zhvillimin ekonomik të vendit tonë e për eksportet shqiptare drejt Danimarkës, duke u shprehur lidhur me mundësitë konkrete për bashkëpunim dypalësh në të ardhmen. Gjithashtu, ftesës së paraqitur nga Ambasadori Robo për të zhvilluar një vizitë në Shqipëri ajo ju përgjigj pozitivisht, duke u shprehur so do të konsiderojë rastin më të parë që do t’i lejojë axhenda e saj e ngarkuar.