Në një moment të rëndësishëm për dinamikat e sigurisë dhe procesin e integrimit evropian, Shqipëria u përfaqësua në Samitin e 8-të të Komunitetit Politik Evropian (EPC), duke riafirmuar angazhimin e saj të qëndrueshëm në rrugën drejt integrimit evropian dhe forcimit të partneriteteve ndërkombëtare.
Kryeministri Edi Rama mori pjesë në Samitin e 8-të të Komunitetit Politik Evropian (EPC), i cili mblodhi së bashku liderë evropianë për të diskutuar sfidat e përbashkëta në fushën e sigurisë, stabilitetit dhe bashkëpunimit në një kontekst gjeopolitik në ndryshim të vazhdueshëm, duke riafirmuar nevojën për koordinim dhe kohezion strategjik në kontinentin evropian.
Në vijim, Zëvendësministrja për Evropën dhe Punët e Jashtme, znj. Megi Fino, si përfaqësuese e Republikës së Shqipërisë në Dialogun e Jerevanit, mori pjesë në panelin me temë “Zgjerimi i BE-së dhe Integrimi Evropian: Uniteti, Urgjenca dhe Fragmentimi në një Peizazh Gjeopolitik në Ndryshim”, duke kontribuar në diskutimet mbi procesin e zgjerimit të Bashkimit Evropian dhe duke theksuar rëndësinë e balancimit ndërmjet integrimit strategjik dhe konsolidimit të vlerave evropiane. 
Në tërësi, pjesëmarrja e Shqipërisë në këto forume të nivelit të lartë pasqyron angazhimin e vendit për të avancuar agjendën evropiane dhe për të forcuar dialogun dypalësh si dhe bashkëpunimin shumëpalësh.
Në këtë kuadër, Ambasadorja e Republikës së Shqipërisë në Armeni (jo rezidente), znj. Luela Hajdaraga, si pjesë e delegacionit shqiptar, zhvilloi një vizitë në Konsullatën e Nderit, ku u prit nga Konsulli i Nderit, z. Artur Babayan. Takimi rikonfirmoi rëndësinë e bashkëpunimit institucional dhe forcimin e mëtejshëm të marrëdhënieve dypalëshe.
Gjithashtu, Ambasadorja Hajdaraga mori pjesë në ekspozitën e piktorit të njohur armen Grigor Khanjyan, një figurë me lidhje historike me Shqipërinë, i cili gjatë periudhës së studimeve në Shqipëri në vitet ’50 ka pasqyruar në veprat e tij elemente të jetës shqiptare të asaj kohe, përfshirë peizazhe dhe kostume tradicionale, duke krijuar një urë të çmuar kulturore mes dy vendeve.
Ambasada e Republikës së Shqipërisë në Armeni (jo rezidente) mbetet e angazhuar për avancimin e agjendës dypalëshe Shqipëri-Armeni, përmes forcimit të marrëdhënieve dhe promovimit të diplomacisë aktive, dialogut si dhe bashkëpunimit kulturor e politik.
