Në kuadër të Ditës Ndërkombëtare të Gruas, Ambasadorja e Republikës së Shqipërisë në Greqi, znj. Luela Hajdaraga, mori pjesë në aktivitetin e organizuar nga Kryetari i Bashkisë së Athinës, Prof. Haris Doukas, në ambientet e Bashkisë së Athinës. Gjatë këtij takimi, u diskutua mbi nismat dhe politikat në fushën e barazisë gjinore dhe luftës kundër diskriminimit, me synimin për të eksploruar mundësitë e një bashkëpunimi të frytshëm me Bashkinë e Athinës.

Në fjalën e saj, Ambasadorja Hajdaraga theksoi se barazia gjinore është një domosdoshmëri për zhvillimin e qëndrueshëm dhe funksionimin demokratik të shoqërisë. Ajo nënvizoi se gratë duhet të jenë të përfaqësuara dhe të angazhuara aktivisht në të gjitha nivelet e vendimmarrjes, pasi përfshirja e tyre sjell politika më gjithëpërfshirëse dhe një shoqëri më të drejtë.

Gjithashtu, Ambasadorja theksoi rëndësinë e forcimit të përpjekjeve institucionale për mbrojtjen e të drejtave të grave dhe eliminimin e çdo forme diskriminimi, duke theksuar angazhimin e Ambasadës së Shqipërisë në Athinë për të mbështetur dhe promovuar këtë kauzë. Duke u ndalur tek gratë e komunitetit shqiptar në Greqi, Ambasadorja vlerësoi rolin e tyre të rëndësishëm në ruajtjen e identitetit kombëtar dhe kontributin e tyre në shoqërinë greke. Ajo inkurajoi gratë shqiptare të vazhdojnë të jenë aktive në jetën shoqërore, kulturore dhe ekonomike, duke shërbyer si ura lidhëse mes dy vendeve dhe duke promovuar vlerat e përbashkëta të barazisë dhe respektit reciprok.