Ambasada e Republikës së Shqipërisë në Greqi, në bashkëpunim me Shoqatën e Ushtarakëve në Rezervë – Dega Greqi, me kryetar z. Aqif Bozhiqi, organizoi në ambientet e saj konferencën me titull “Roli dhe Kontributi i Shqipërisë në Fitoren mbi Fashizmin në Luftën e Dytë Botërore”.

Nderuan me prezencën e tyre në këtë aktivitet Udhëheqësi i Zyrës së Interesave të Kosovës – Kosovo in Greece, z. Fitim Gllareva, anëtarë të shoqatës, dhe miq. Në fjalën e saj, Ambasadorja e RSH-së në Greqi, znj. Luela Hajdaraga theksoi qëndrueshmërinë dhe sakrificat e shqiptarëve, duke e cilësuar këtë periudhë si një kapitull krenarie në historinë tonë kombëtare. Gjithashtu, Ambasadore Hajdaraga shprehu mirënjohje të thellë dhe falënderoi Shoqatën e Ushtarakëve në Rezervë-Dega Greqi për rolin dhe kontributin e tyre të vyer në mbështetjen dhe fuqizimin e atyre që kanë shërbyer me përkushtim dhe sakrificë në forcat e armatosura.

Konferenca u pasurua me referata nga Kapiteni i Parë dhe Kryetar i Shoqatës së Ushtarakëve në Rezervë – Drga Greqi, z. Aqif Bozhiqi, Akademiku Ushtarak Kolonel z. Andrea Nito, ish-Oficeri Rezervist z. Kosta Kallonjeri dhe Atasheu Ushtarak Kolonel z. Artan Bufi.

Në fjalën e tij, Kolonel z. Artan Bufi theksoi ndër të tjera se “Shqipëria, si një anëtar i NATO-s, ka kontribuar në mënyrë të vazhdueshme për ruajtjen e sigurisë dhe paqes ndërkombëtare, për stabilizimin e rajonit të Ballkanit dhe për mbështetje në misionet globale të Aleancës. Angazhimi i Shqipërisë është i rëndësishëm për forcimin e mëtejshëm të kohezionit të NATO-s dhe për ndihmën që ky vend mund t’i ofrojë partnerëve dhe aleatëve të tij në fushën e sigurisë dhe mbrojtjes”.

Aktiviteti u përshëndet gjithashtu nga aktori Festim Zaçe me poezinë “Nënë Shqipëri” nga Dritëro Agolli, si dhe nga grupet artistike “Lot Kurbeti” dhe “Kreshtat e Shqipërisë”.

Një falënderim i veçantë për të gjithë ata që kontribuan në nderimin e kësaj trashëgimie historike të vyer!