Denion Meidani

Denion Meidani është një diplomat i shquar me një përvojë të gjatë dhe të pasur në shërbimin publik, aktualisht në postin e Ambasadorit të Jashtëzakonshëm dhe Fuqiplotë të Shqipërisë në Maqedoninë e Veriut. Pas një karriere të gjatë dhe të larmishme, ai rikthehet në Ministrinë e Punëve të Jashtme, duke sjellë me vete përvojë të vyer në fusha të ndryshme si lufta kundër ekstremizmit të dhunshëm, administrata doganore, monitorimi i komunikimeve elektronike, dhe organe të tjera ligj-zbatuese.

Studimet e tij përfshijnë një diplomë në Shkenca Kompjuterike dhe Marrëdhënie Ndërkombëtare nga Clark University, SHBA, përfunduar në vitin 2001.

Në vitin 2002, ai kreu një Master në Diplomaci, me fokus në Ekonomi Ndërkombëtare, nga Akademia Mesdhetare e Studimeve Diplomatike në Universitetin e Maltës.

Në mars të vitit 2013, ai përfundoi një Master Shkencor në Administrim Biznesi nga Universiteti Bocconi në Milano, Itali.

Denion Meidani ka mbajtur role të rëndësishme në administratën publike, duke përfshirë pozicionin e Drejtorit të Përgjithshëm të Qendrës së Koordinimit kundër Ekstremizmit të Dhunshëm nga 2022 deri në janar 2024, ku ai udhëhoqi programet kombëtare për de-radikalizimin, sistemet e paralajmërimit të hershëm dhe ri integrimin e individëve të prekur.

Përpara kësaj, nga 2021 deri në 2022, ai shërbeu si Zëvendës Drejtor i Përgjithshëm në Drejtorinë e Përgjithshme të Doganave, ku mbikëqyri procedurat doganore dhe administrimin e mallrave të akcizës. Me përvojë në monitorimin dhe kontrollin e komunikimeve elektronike dhe në zbatimin e ligjit brenda sistemit të burgjeve, Denion Meidani ka luajtur një rol kyç në reformat e sektorëve të ndryshëm publikë.

Ai ka shërbyer gjithashtu si këshilltar në pozicione të larta si në Ministrinë e Punëve të Jashtme ashtu edhe në Prokurorinë e Përgjithshme.

Përveç angazhimit në sektorin publik, Denion Meidani ka kontribuar edhe në sektorin privat dhe në atë akademik. Ai flet rrjedhshëm shqip, anglisht, italisht dhe turqisht.