Pak orë përpara fillimit të takimit të Ministrave të Jashtëm të NATO-s që këtë vit mbahet në Letoni, Ministrja për Evropën dhe Punët e Jashtme, Olta Xhaçka, mori pjesë në forumin me temë “Perspektiva e NATO-s drejt vitit 2030 dhe më tej”. 
Në këtë Ministerial marrin pjesë gjithashtu edhe Sekretari i Shtetit i SHBA-ve, Antony Blinken dhe Sekretari i Përgjithshëm i NATO-s, Jens Stoltenberg. 
Ministrja Xhaçka theksoi se Koncepti strategjik i 2022, me fokus në unitetin, solidaritetin dhe vlerat e përbashkëta është rrugëzgjidhja e vetme ndaj kërcënimeve të vazhdueshme hibride me të cilat bota po përballet. 
Në këtë aspekt, Ministrja Xhaçka e cilësoi Ballkani Perëndimor si një nga historitë e mëdha të suksesit të NATO-s dhe angazhimit shumëpalësh. 
“Për sa i përket rimarrjes së iniciativës dhe mohimit të hapësirës dhe vakumit ndaj rivalëve, Ballkani Perëndimor është një fryt i arritshëm. Gjithçka që duhet është një përfshirje e përkushtuar, e fortë dhe e vendosur për të zgjidhur mosmarrëveshjet e mbetura dhe për të përfshirë Ballkanin Perëndimor në strategjinë e NATO-s. Çfarë roli mund të luajë Aleanca në fusha të tilla? Ballkani Perëndimor është shembulli i përsosur ku kërcënimet e sigurisë u adresuan jo vetëm përmes ndërhyrjes ushtarake, por përmes një kombinimi holistik të fuqisë së fortë dhe të butë, si dhe një angazhimi afatgjatë”, u shpreh ministrja gjatë fjalë së saj. 
Në fund të fjalës, Ministrja Xhaçka nënvizoi se investimi në Diplomacinë Publike dhe në Komunikim është po aq thelbësore për suksesin e NATO-s, sa edhe investimi në teknologji dhe armatime të reja. 
Vizita e Ministres Xhaçka në Letoni vjen pas pjesëmarrjes së saj në Forumin e Gjashtë të Unionit të Mesdheut që u mbajt në Barcelonë. 
Ndërkohë në datat 1 dhe 3 dhjetor, kryediplomatja shqiptare do të udhëtojë drejt Suedisë, ku do të mbahet Ministeriali i 28-të i Këshillit të OSBE-së.