Në datën 12 tetor, ambasadori Pëllumb Qazimi ka zhvilluar takim online me Simon Zajc, sekretar shteti në Ministrinë e Zhvillimit Ekonomik dhe Teknologjisë të Sllovenisë. Gjatë takimit janë shkëmbyer vlerësime për treguesit e këtij viti në fushën e turizmit në Shqipëri dhe në Slloveni. Po ashtu, është diskutuar për mënyrat e format e rimëkëmbjes në fushën e turizmit pas kufizimeve të shkaktuara nga pandemia e Covid-19. Të dy vendet janë duke punuar për nënshkrimin e një Memorandumi Bashkëpunimi dypalësh në fushën e turizmit.

Nusret Jashari, menaxher futbolli dhe veprimtar shqiptar me banim në Slloveni, së fundi përmes një akti fisnik ka dhënë një kontribut kuptimplotë për shkollën “Naim Frashëri”, në vendlindjen e tij, Negotinë e Pollogut në Maqedoninë e Veriut. Në kushtet e pandemisë së Covid-19, që ka prekur mbarë botën, jo të gjithë nxënësit e vendlindjes së tij, e kanë patur mundësinë të ndjekin shkollën online. Ai në komunikim me drejtorin e shkollës, ka blerë dhe dërguar 34 IPAD për përdorim nga nxënësit që e kanë patur nevojë të menjëhershme një gjë të tillë.

Në datën 3 nëntor, ambasadori Pëllumb Qazimi ka pritur në Ambasadë shqiptaren Selda Sukaj Kocinaj nga Durrësi me banim në Celje të Sllovenisë. Ajo është e punësuar si moderatore ndërkulturore në Universitetin Popullor në Celje dhe është bashkëautore e fjalorit sllovenisht-shqip për fëmijë. Selda është e përfshirë dhe e angazhuar në projekte të aktivizimit social të grave shqiptare, financuar nga Ministria e Punës të Sllovenisë dhe nga Bashkimi Evropian.

Me ftesë të kryeministrit të Sllovenisë, Janez Janša, kryeministri i Shqipërisë, Edi Rama, zhvilloi një vizitë pune në Slloveni. Ai u takua me homologun slloven në Bled për të diskutuar mbi Planin e Madh të Investimeve të BE në Ballkanin Perëndimor, ecurinë e procesit të integrimin europian në Shqipëri e në rajon, gjendjen politike dhe ekonomike të vendeve të rajonit, në kontekstin e përgatitjeve mbresëlënëse të Sllovenisë për mandatin e Presidencës së Bashkimit Europian vitin e ardhshëm.