Ministri në detyrë për Evropën dhe Punët e Jashtme të Shqipërisë, Gent Cakaj, në datën 6 korrik ka realizuar vizitë në Slloveni. Në takimin me Ministrin e Punëve të Jashtme të Sllovenisë Anže Logar, janë diskutuar temat e bashkëpunimit dypalësh, shtrirë në disa fusha, bashkëpunimi në kuadrin e nismave rajonale dhe të organizatave ndërkombëtare, etj.

Në datën 22 qershor, ambasadori Pëllumb Qazimi priti në takim studjuesin Peter Štoka, tashmë të njohur jo vetëm ndër shqiptarët e Sllovenisë për kontributin e tij të pashoq e të çmuar në gjurmimin, evidentimin dhe publikimin e dëshmive të hershme shqiptare në Istrian sllovene dhe më gjerë.

Në pasditen e datës 19 qershor, ambasadorët e Shqipërisë, Francës, Rumanisë, Serbisë, Zvicrës dhe Përfaqësimit të Komisionit Evropian në Slloveni iu bashkuan veprimtarisë humanitare të lundrimit me kajak në lumin Ljubljanica të Lubjanës. Veprimtaria, si çdo vit u organizua nga Shoqata humanitare "Hiša Sonca - Shtëpia e Diellit". Të ardhurat e grumbulluara destinohen për fëmijët në nevojë, si për kërkesat bazë të jetesës, ashtu edhe për pushimet e tyre verore.

Në datën 11 qershor, ashtu si vitet e mëparshme, ambasadori Pëllumb Qazimi së bashku me kolegë ambasadorë, ishte i pranishëm në veprimtarinë e përvitshme të Ditës Diplomatike, organizuar nga Bashkia Škofja Loka. Të pranishmit u njohën me vlerat historike, kulturore dhe të trashëgimisë të qytetit, si dhe me arritjet më të fundit në fushën e arsimit e të kujdesit për të moshuarit.