Në datën 23 janar, ambasadori Pëllumb Qazimi ishte i pranishëm në veprimtarinë e radhës të diplomacisë ekonomike, organizuar nga ana e Ministrisë së Punëve të Jashtme të Sllovenisë në Novo Mesto.

Në datën 17 janar, ambasadori Pëllumb Qazimi ka zhvilluar takim me Mykhailo F. Brodovych, ambasador i Ukrainës në Slloveni. Gjatë takimit është diskutuar për prioritetet e Kryesisë Shqiptare të OSBE-së 2020, duke u fokusuar në dimensionin politiko-ushtarak dhe sidomos në krizën në e rreth Ukrainës. Po ashtu, bashkëbiseduesit kanë diskutuar edhe për intensifikimin e marrëdhënieve e të bashkëpunimit dypalësh Shqipëri-Ukrainë.

Në datën 16 janar, ambasadori Pëllumb Qazimi është pritur në takim nga Zoran Stančič, drejtues i Përfaqësimit të Komisionit Evropian në Slloveni. Gjatë takimit janë shkëmbyer informacion dhe vlerësime lidhur me metodologjinë e re për t'u ndjekur për hapjen e bisedimeve të anëtarësimit në BE, si dhe paralelisht edhe dhënien e dritës së gjelbërt për hapjen e bisedimeve të anëtarësimit për Shqipërinë dhe Maqedoninë e Veriut, duke pritur një sinjal pozitiv për të dy vendet në samitin e Zagrebit të muajit maj.

Në datën 15 janar, ambasadori Pëllumb Qazimi priti në takim prezantues Timur Eyvazov, ambasador i ri i Federatës Ruse në Slloveni. Gjatë takimit u shkëmbye informacion lidhur me marrëdhëniet dypalëshe Shqipëri-Federatë Ruse, marrëdhëniet e Sllovenisë me dy vendet respektive, Shqipërinë dhe Fdederatën Ruse. Po ashtu, ambasadori Qazimi informoi ambasadorin e Federatës Ruse lidhur me prioritetet e Kryesisë Shqiptare të OSBE-së dhe perspektivën evropiane të Shqipërisë.