Në datën 17 dhjetor, ambasadori Pëllumb Qazimi është pritur në takim nga Aleš Šabeder, ministër i Shëndetësisë të Republikës së Sllovenisë. Takimi kishte si synim kryesor mundësinë e ndihmës sllovene në fushën e shëndetësisë për situatën e pas tërmetit në Shqipëri. Ditë më parë, ministrja e Shëndetësisë dhe Mbrojtjes Sociale të Shqipërisë i ka dërguar letër homologut slloven lidhur me këtë çështje.

Mbrëmja e datës 14 dhjetor në Lubjanë, nga ana e »MM Contemporary Performance, Berkler College of Music«, në kuadrin e »Balkan Open Jam«, iu kushtua muzikës shqiptare. Në prani të pjesëmarrësve në veprimtari, grupi muzikor interpretoi me profesionalizëm të lartë dhe qartësi gjuhësore këngë tradicionale dhe qytetare nga Shqipëria. Asnjë nga interpretuesit nuk ishte i kombësisë shqiptare, gjë që meriton vlerësime të veçanta.

Në datën 13 dhjetor, u zhvillua në Lubjanë takimi i punës i radhës i ambasadorëve të vendeve anëtare të Aleancës të NATO-s, akredituar në Slloveni. Takimi u bashkëorganizua nga Pëllumb Qazimi, ambasador i Shqipërisë dhe Paolo Trichilo, ambasador i Italisë. E ftuar nderi ishte Nataša Dolenc, sekretare shteti në Mnistrinë e Mbrojtjes të Sllovenisë. Takimi u zhvillua pas samititit të NATO-s në Londër në datat 3 dhe 4 dhjetor dhe nën frymën e Deklaratës së Londrës të takimit të Këshillit të Atlantikut të Veriut.

Në datën 12 dhjetor, ambasadori Pëllumb Qazimi u prit në takim nga Tadeja Forštner Perklič, sekretare shteti në kabinetin e Kryeministrit të Sllovenisë. Gjatë takimit, ambasadori shprehu falënderime për kontributin e deritanishëm të Sllovenisë ndaj Shqipërisë për përballimin e fazës së parë të pasojave të pas tërmetit.