Prej javësh në Muzeun e Historisë së Re, Celje, është hapur ekspozita "Čutim Celje - E ndjej Celjen", e cila është e hapur për vizitorët deri në muajin shtator. Në ekspozitë prezantohet edhe intervista e veprimtares shqiptare Vera Haliti dhënë gazetës "Novi tednik".

Në datën 14 qershor, në Rogaška Slatina dhe Šmarje pri Jelšah, u zhvilluan veprimtari në kuadrin e Festivalit të poezisë "Pranger". Organizatorët për këtë vit kishin zgjedhur për prezantim gjuhën shqipe, si gjuhë pak e përfaqësuar në ngjarjet e mëparshme.

Në datën 11 qershor, në qytetin Škofja Loka,u organizua Dita Diplomatike, ku drejtues e përfaqësues të misioneve diplomatike në Slloveni u njohën me vlerat historike, kulturore, arsimore e të arkitekturës të qytetit. Kryetari i bashkisë së qytetit, Tine Radinja dhe Miha Ješe pritën dhe shoqëruan të pranishmit gjatë gjithë veprimtarisë. Tashmë dita diplomatike është shndërruar në veprimtari të përvitshme për këtë qytet. Në këtë ngarje ishte i pranishëm edhe ambasadori Pëllumb Qazimi.  Ambasada e Shqipërisë ka vendosur bashkëpunim të ngushtë me këtë qytet të Sllovenisë.

Në kuadrin e 30 vjetorit të Shoqatës Kulturore Shqiptare “Migjeni”, Lubjanë, Presidenti i Republikës së Shqipërisë, Ilir Meta, dekoron me Titullin “Naim Frashëri” Shoqatën Kulturore Shqiptare “Migjeni” dhe ish kryetarin e saj Gjon Simoni (pas vdekjes). Titujt e lartë u dorëzuan nga Pandeli Majko, Ministër Shteti për Diasporën, gjatë ceremonisë të organizuar në pasditen e datës 7 qershor në Muzeun e Historisë Bashkëkohore Sllovene në Lubjanë.