Pavarësisht kufizimeve të shkaktuara nga pandemia e Covid-19, Ambasada ka vazhduar kontakte, shkëmbime informacioni dhe takime me përfaqësues të bisneseve sllovene të interesuara për të hyrë në tregun shqiptar. Gjatë muajve tetor-nëntor janë asistuar me informacionin e nevojshëm pesë kompani sllovene, të cilat kanë realizuar udhëtime biznesi në Shqipëri. Në datën 19 nëntor, në Ambasadë është pritur Bogdan Tončič, menaxher rajonal i kompaninë Alpina, e profilizuar në industrinë e këpucëve dhe e njohur në mbarë botën për produktet e saj në fushën e skiimit. Kompania është e interesuar që me lehtësimin e kufizimeve të pandemisë, të hyjë në tregun shqiptar, jo vetëm për të shitur produktet e saj, por edhe më tepër, për investim në këtë sektor.