Shqip
English
Instituti Ndërkombëtar për Lindjen e Mesme dhe Ballkanin, IFIMES, në Slloveni, në datën 23 qershor organizoi ligjëratën "Gjeopolitikat në Lindjen e Mesme dhe Azinë Jugore - Mësime për Ballkanin", mbajtur nga studjuesi amerikano-pakistanez Abdullah Khurram. Ligjëruesi gjatë fjalës së tij veçoi tolerancën dhe kujdesin e shqiptarëve ndaj të tjerëve. Para të pranishmëve ai paraqiti atë që ndodhi me hebrenjtë në Shqipëri gjatë Luftës së Dytë Botërore. Ai solli në vëmendje se Shqipëria ishte ndryshe nga vende të tjera. Fundi i luftës evidentoi shumë dhe më shumë hebrenj në Shqipëri se sa në fillim të saj. Kjo, sipas tij, përfaqëson tregues kuptimplotë për shqiptarët dhe Shqipërinë edhe në ditët e sotme. Toleranca shqiptare duhet njohur e respektuar, theksoi ai.
Ambasadori Pëllumb Qazimi zhvilloi takim të veçantë me studjuesin, ku u shkëmbyen mendime për zhvillimet dhe proceset integruese në Shqipëri dhe në rajonin e Ballkanit Perëndimor. Ai kishte dëgjuar shumë për Shqipërinë, por asnjëherë nuk kishte patur rast për të biseduar drejtpërdrejtë me shqiptarë.
Studjuesi Abdullah Khurram, me kontribute ligjërimesh për zhvillime ndërkombëtare në universitete amerikane dhe pakistaneze, është duke zhvilluar vizita në disa vende të Ballkanit Perëndimor. Pas Sllovenisë ai ka zhvilluar tur njohës në Kroaci, Bosnje dhe Hercegovinë dhe Serbi. Në datat 3 deri 6 korrik ai do të vizitojë Shqipërinë. Në planet e tij përfshihet edhe botimi së afërmi në SHBA i një artikulli për Shqipërinë dhe tolerancën shqiptare.
