Gazeta sllovene Finance e datës 20 nëntor i ka kushtuar një faqe të saj klimës së biznesit në Shqipëri, lehtësirave që janë krijuar së fundi, duke përmendur faktin edhe çuarjen e taksës për biznese të caktuara deri në zero. Gazeta edhe në versionin elektronik bën të ditur se "Qeveria e Edi Ramës ka marrë një sërë masash për të përmirësuar mjedisin e biznesit në Shqipëri, me synimin e tërheqjes të sa më shumë investitorësh të huaj".

Ndër të tjera artikulli thekson procedurat e shpejta dhe të lira në pikpamje të kostos për rregjistrimin e bizneseve. Ndërkohë nënvizon rëndësinë e reformës në drejtësi si përparësi edhe për zhvillimin ekonomik të vendit. Në artikull shkruhet se ambasadori shqiptar në Slloveni, Pëllumb Qazimi vlerëson se masat e marra do të nxisin zhvillimin e sipërmarrjes në Shqipëri, si edhe rritjen e interesit të investitorëve të huaj.