Shqip
English
Në datën 29 janar ambasadori Pëllumb Qazimi u prit në takim nga Znj. Darja Bavdaž Kuret, sekretare shteti në Ministrinë e Punëve të Jashtme të Sllovenisë. Ambasadori falënderoi Znj. Kuret për mbështetjen e saj të drejtpërdrejtë për suksesin e konsultimeve diplomatike dypalëshe të fundvitit të kaluar. Ai informoi lidhur me ecurinë e reformave në Shqipëri dhe pritmëritë për hapjen e negociatave të anëtarësimit të Shqipërisë në BE. Pjesë e informimit ishin edhe veprimtaritë e Ambasadës gjatë vitit 2016, si dhe lidhjet e vendosura dhe bashkëpunimi tashmë funksional me disa organizata qeveritare e jo qeveritare në Slloveni.
Bashkëbiseduesit ndanë të njejtin qëndrim se marrëdhëniet ndërmjet dy vendeve janë shumë të mira në fushat politike, diplomatike, shkëmbimeve kulturore, etj. Ndërkohë që duhet thelluar puna e nisur për rritjen e bashkëpunimit e të shkëmbimeve ekonomike e tregtare.
Sekretarja e shtetit Darja Bavdaž Kuret u shpreh se Shqipëria duhet të vazhdojë punën për reformat dhe këto të fundit së bashku me rezultatet e tyre të insistohet të bëhen pjesë e vlerësimeve të Komisionit Evropian për Shqipërinë. Sllovenia mbetet mbështetëse e palëkundur e integrimit Evropian të Shqipërisë. Sllovenia është në favor të zgjerimit të Bashkimit Evropian dhe Shqipëria duhet të konsiderojë Slloveninë si avokate dhe mbështetëse të fortë për integrimin evropian. Znj. Kuret evidentoi gjithashtu rritjen e dukshmërisë të Shqipërisë në Slloveni dhe inkurajoi vijimin e punës në këtë drejtim.
Gjatë vitit 2016 në marrëdhëniet ndërmjet dy vendeve parashikohen shkëmbim vizitash të nivelit të lartë, si dhe disa veprimtari promovuese të natyrës kulturore, ekonomike, etj.
