Në datën 1 shkurt ambasadori Pëllumb Qazimi u prit në takim nga Z. Igor Teršar, drejtor i JSKD – Fondi Publik Slloven për Veprimtari Kulturore. JSKD është organizatë publike sllovene me mision promovimin e artit dhe kulturës, kryesisht të autorëve dhe grupeve amatore. Organizata është e shtrirë dhe ushtron aktivitetin në Lubjanë dhe në 59 qendra të tjera në mbarë Slloveninë. Prej 10 vitesh kjo organizatë së bashku me organizata simotra nga vende të BE-së dhe vende të tjera evropiane kanë krijuar Organizatën Evropiane për promovimin e kulturës dhe të artit, duke zbatuar projekte në vende të ndryshme për promovim e shkëmbim kulturash ndërmjet vendeve, duke shfrytëzuar edhe fonde të BE-së. Drejtuesi i JSKD paraqiti kërkesën dhe dëshirën që edhe Shqipëria të jetë pjesë e kësaj organizate evropiane.

Bashkëbiseduesit shprehën gadishmërinë për vendosje të një bashkëpunimi të qëndrueshëm, përmes veprimtarive të ndryshme promovuese të imazhit të Shqipërisë dhe jo vetëm në Lubjanë, por edhe në qytete të tjera të Sllovenisë, ku kjo organizatë është e shtrirë. Pjesë e këtij bashkëpunimi do të jenë jo vetëm koncerte e ekspozita të ndryshme me grupe dhe autorë nga Shqipëria, por edhe veprimtari kulturore dhe artistike të komunitetit shqiptar në Slloveni.

Në bashkëpunim me JSKD, Ambasada e Shqipërisë do të çel në muajin mars në Galerinë KULT 3000, Lubjanë, Ekspozitën e pikturës dhe skulpturës “Proximus” të GALERIAKALO, Tiranë. Ekspozita do të jetë në vijim të tryezës të rrumbullakët që i kushtohet bashkëpunimit ndërmjet Shqipërisë dhe Sllovenisë.